Rusiye kontrolindeki Qırım garnizon arbiy mahkemesiniñ binası ögünde tutulğan vatandaş jurnalistleri Ali Suleymanov, Amar Abdulgaziyev ve Rustem Useinov yiberildi.
Bu aqta «Qırım birdemligi» cemaat birleşmesi advokat Edem Semedlâyevniñ malümatına esaslanıp bildirdi.
«Mühbirler memuriy protokol tizilmeyip yiberildi. Olarnı tahminen 2 saat tutıp, parmaq işçleri ve DNA almağa tırıştılar, amma jurnalistler razı olmadı. 51-inci maddege esaslanıp, bir izaat da bermediler, Abdulgaziyev ise eki qırımtatarına qarşı ükümni aydınlatqanını ayttı. Ne yazıq ki, devamı olacaqmı ve protokollar tizilecekmi belli degil», – dep aytıla haberde.
Fevralniñ 11-nde Qırım garnizon arbiy mahkemesiniñ binası ögünde Rusiye polisiniñ hadimleri qırımlı Zekirya Muratov ve Vadim Bektemirovğa qarşı ükümni aydınlatqan üç vatandaş jurnalisti tutuldı.
Hatırlatamız, bugün «Qırım musulmanları davasınıñ» mabüsleri Vadim Bektemirov ve Zekirya Muratov Rostov-na-Donu Cenübiy okrugınıñ arbiy mahkemesi tarafından 11 ve 11,6 yıl sert rejimli koloniyada qalmasına üküm etildi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
