İlhaq etilgen Qırımda, qanunsız migratsiya yolunı açmaqta şeklengen, Yalta "içki işler organlarınıñ hadimleri yapqan qanunsız areketler"niñ teşkerüvi yapıla.
Bunı Rusiye İçki İşler Nazirliginiñ (İİN) Qırım idaresiniñ matbuat hızmeti bildirmekte.
"Hadimlerniñ qabaatı tasdıqlansa, olarnı içki işler organlarından işten çıqarırlar, olarnıñ başlıq ise intizamiy mesüliyet çekilecek", - denile beyanatta.
Qırım Tahqiqat komitetiniñ matbuat hızmeti bildirgeni kibi, Yaltada qanunsız migratsiya yolunı açmaqta şeklengen, şeerniñ rusiye politsiyası hadimleri yaqalandı. Operatsiyanı sentâbr 18-inde gece keçirdiler.
Qayd etile ki, şeklengen adamlarnıñ evlerinde ve iş yerlerinde tintüv yapıldı, tahqiqat içün meraqlı ola bilecek bütün kerekli vesiqalar tutulıp alındı. Şimdi dava iştierakçileri sorğularğa çekile. Rusiye tahqiqatı, olarğa qarşı sıñırlayıcı tedbirlerni saylamaq içün mahkemede muracaat etmege azır.
