Yaltada qanunsız migratsiya yolunı açmaqta şeklengen, şeerniñ rusiye politsiyası hadimleri yaqalandı. Operatsiyanı sentâbr 18-inde gece keçirdiler.
Bunı Qırım Tahqiqat komitetiniñ matbuat hızmeti bildirmekte.
"Cinayet gruppasınıñ teşkilcisi, Yalta şeerinde Rusiye İİN idaresiniñ vatandaşlıq bölüginiñ başı olağanı tayin etildi. Öz planını amelge keçirmek içün o, öz müavinini, "Massandrovskiy" politsiyasınıñ migratsiya bölüginiñ başlığını ve üç yerli adamnı celp etti. Olar, Rusiye vatandaşlığını tezce ve maniasız resmiyleştirmege istegenlerden qabar olmaqta aracı ediler", - denile beyanatta.
Qayd etile ki, şeklengen adamlarnıñ evlerinde ve iş yerlerinde tintüv yapıldı, tahqiqat içün meraqlı ola bilecek bütün kerekli vesiqalar tutulıp alındı. Şimdi dava iştierakçileri sorğularğa çekile. Rusiye tahqiqatı, olarğa qarşı sıñırlayıcı tedbirlerni saylamaq içün mahkemede muracaat etmege azır.
Cinaiy davanıñ tahqiqatını, Qırımda Tahqiqat komitetiniñ Baş tahqiqat idaresiniñ başı vazifesini becergen Vladimir Terentyev nezaret ete.
Tutulğan memurlarnıñ ya da advokatlarınıñ açıq tefsirleri yoq.
