İnsan aq-uquqları qoruvı cemiyeti, Rusiye FSB-si tarafından tutulğan aqmescitli Denis Kaşuk sessizlik rejimiden vazgeçse, oña yardım etip olur. Bunı Qırım.Aqiqat mühbirine Qırım uquq qoruyıcısı Abdureşit Cepparov haber etti.
Uquq qoruyıcısı bildirdi ki, şimdilik Kaşuknıñ soyları onıñ imayesi içün bir strategiya daa saylamadı.
"Dekabrniñ 17-sinde tuvganları onı tapıp olamadı. Qadını politsiyaga muracaat etti, amma o FSB-de tutulğanı belli oldı. Soñra, şimdi Qırımda olğanı kibi, evlerinde tintüv yapıldı. FSB hadimleri olğan maskalı ve avtomatlı adamlar er şeyni ast-üstüne çevirdi. Eki qız şaat edi. Şimdi Denis SİZOda, qorantası şaşmaladı, olar ne areket tarzını saylamalılarnı bilmey",- terif etti uquq qoruyıcısı.
Uquq qoruyıcısı qayd etti ki, FSB nezaretinde olğan Denis Kaşukka yalıñız imayesiniñ açıq şeklini saylasa, yardım etmek mümkün.
Ceparovnıñ aytqanına köre, Kasuk advokatlarnıñ yardımını inkâr ete.
Ukraina Tış İşler Nazirligi ilhaq etilgen Qırımda aqmescitli Denis Kaşuk apis etilgeni içün Rusiyege narazılığını bildirdi.
Rusiye kontrolindeki Aqmescitniñ Kiyev rayon mahkemesi dekabrniñ 20-nde Aqmescit sakini Denis Kaşuknı 2020 senesi fevralniñ 18-ne qadar SİZOğa aldı. Advokat Nazim Şeyhmambetov Kaşuknıñ ais etilmesine apellâtsiya şikâyetini berecek ola.
Advokat Nazim Şeyhmambetov, Rusiye FSBsi Aqmescit sakini Denis Kaşuknı silâ satın alğanından ve saqlağanından şübheli sayıp tuttı. Denis Kaşuknıñ ömür arqadaşı Olga Qırım.Aqiqatqa izaat berip, dekabrniñ 17-nden berli bağda olmağanını ve evlerinde tintüv keçirilgenini bildirdi.
Advokat Nazim Şeyhmambetov, FSB Kaşuknı eki madde – Rusiye Ceza kodeksiniñ 222-nci ve 222.1-incisine istinaden («qanunsız satın aluv, satış, saqlap, silâ, onıñ esas parçalarınıñ taşıması») – şübheli saya, dep bildirdi.
