Ukraina Tış İşler Nazirligi ilhaq etilgen Qırımda aqmescitli Denis Kaşuk apis etilgeni içün Rusiyege narazılığını bildirdi. Bunı müessiseniñ matbuat hızmeti bildire.
"Kaşuk sanki advokattan vazgeçkeni içün oña qarşı bedeniy ve psihologik basqı qullanılğanını tahmin ete bilemiz. Rusiye işğalci akimiyetiniñ böyle areketlerini ukrain vatandaşlarnıñ qorquzuvı ve olarğa qarşı basqı kibi qabul etemiz", - denile beyanatta.
Bunıñ sebebinden, müessise bildirgeni kibi, Ukraina Rusiyeden ilhaq etilgen Qırımda insan aqlarınıñ bozmasını toqtatmağa, qanunsız Ukraina vatandaşlarını acele tarzda boşatmağa, işğalci devlet olaraq halqara uquqqa köre bütün mecburiyetlerni amelge keçirmege talap ete.
"Rusiyeniñ ilhaq etilgen qırımda insan aqlarınıñ bozmasını toqtatmaq içün, halqara topluluqnı tecavuzcı devletke siyasiy, diplomatiya ve sanktsiya basqısını arrtırmağa muracaat etemiz", - denile beyanatta.
Rusiye kontrolindeki Aqmescitniñ Kiyev rayon mahkemesi dekabrniñ 20-nde Aqmescit sakini Denis Kaşuknı 2020 senesi fevralniñ 18-ne qadar SİZOğa aldı. Advokat Nazim Şeyhmambetov Kaşuknıñ ais etilmesine apellâtsiya şikâyetini berecek ola.
Advokat Nazim Şeyhmambetov, Rusiye FSBsi Aqmescit sakini Denis Kaşuknı silâ satın alğanından ve saqlağanından şübheli sayıp tuttı. Denis Kaşuknıñ ömür arqadaşı Olga Qırım.Aqiqatqa izaat berip, dekabrniñ 17-nden berli bağda olmağanını ve evlerinde tintüv keçirilgenini bildirdi.
Advokat Nazim Şeyhmambetov, FSB Kaşuknı eki madde – Rusiye Ceza kodeksiniñ 222-nci ve 222.1-incisine istinaden («qanunsız satın aluv, satış, saqlap, silâ, onıñ esas parçalarınıñ taşıması») – şübheli saya, dep bildirdi.
Rusiye FSBsi Denis Kaşuknıñ tutuluvını şimdilik izaatlamadı.
