"Dört aydır eşitme qabiliyetim zayıftır ve sol qulağım daima çıñlay, bu maña dayanılmaz ağrı ketire", - işğal etilgen Qırımda 7 yıl apis cezasına mahküm etilgen qırımlı faal İrına Danılovıç dedi. Danılovıç tibbiy yardım kösterilmemesine narazılıq bildirip quru açlıq aktsiyasınını ilân etti.
Aqmescit SİZO-sından Rusiye nezaretinde olğan Kefe mahkemesine köçürilme vaqtında İrına Danılovıçnıñ vaziyeti zayıflaştı. Esini coyğan allar da oldı.
"Böyle alemetler menim mikroinsult keçirgenimni köstere bilir", - dep yazdı faal. Sağlığı ile bağlı qıyınlıqlar keçken sene küzde başlandı. Amma bugüngece oña iç birtibbiy yardım kösterilmedi. Martnıñ 21-nde Danılovıç narazılıq bildirip quru açlıq aktsiyasını ilân etti.
İrınanıñ babası Bronislav Danılovıç, qızını yalıñız ihtisaslı tibbiy yardım qurtara bilir, dep bildirdi. Onıñ qızına tibbiy yardım kösterilmesi red etilgeniñ bir qaç versiyası bar.
"SİZO hadimleriniñ intiqamı"
Rejim zabitleri mabüslerni yağmalamağa başlağanda o şamata qopardıBronislav Danılovıç
Bronislav Danılovıçnıñ qızına ne içün tibbiy yardım kösterilmemesi ile bağlı tahminlerinden biri bu Aqmescit SİZO hadimleriniñ intiqamıdır.
"Rejim zabitleri mabüslerni yağmalamağa başlağanda o şamata qopardı. İlâclarını, kitaplarını, qaynatqıçını tutıp adılar. Kirli çamaşırnı ortağa çıqardı. Bunı matbuatta derc etti. Er şey keri qaytarılmasını talap etip başladı. Kimse bir şey qaytarmadı. Bunıñ içün taqipler başlandı", - dedi Bronislav Danılovıç.
''Mağazlarda öle bilir edi"
Babasınıñ daa bir tahmini – İrına yarımadada bellisiz ğayıp olğan qırımlı faallerden biri ola bilir edi. Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi.
İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırıştılar. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
"Eger onı qıdırıp başlamasa ve sözde mahkemeniñ istemeden davağa qoşıp qoyğanı tutıp esir etüv video yazısını tapmasa edik o "mağazlarda" öle bilir edi", - dey babası.
"Tip memurlarınıñ intiqamı"
Bronislav Danılovıç dey ki, İrınanıñ faal vatandaş noqta-i nazarı onıñ Rusiye quvetçileri tarafında taqip etilmyesine sebp oldı. Emşire olıp çalışqan İrına "Ekimler alyansı" Rusiye zenaat birligine qoşluğan. O, COVID-19 hastaları ile çalışqanı içün qoşma maaş almağan ekimlerniñ aqlarını mudafaa etken. Basınıñ sözlerine köre, bunı ne tip memurları, ne de işğal yolbaşçıları begene edi.
Tip memurlarınıñ onı sımarlağanına dair fikir barBronislav Danılovıç
"İrına şamata qopardı. O, "Ekimler alyansı"na qoşuldı. Bu da qanundan tış bir teşkilât edi. Hastahaneniñ reberligi tarafından zulum kördi. Tahqiqatçılardan biriniñ ve mağazlarda onı iskencelerge oğratqanlarnıñ aytqanı kibi: "Bu saña kövid ile küreşkeniñ içün. Tip memurlarınıñ onı sımarlağanına dair fikir bar", - dep tahmin ete babası.
2014 senesi Qırım işğal etilgen soñ İrına "Ukrayina medeniyet merkezi"niñ faali oldı, INjir media ve "Qırım esnası" uquq qoruyıcı leyhası ile işbirlik etip keldi.
Zenaatında ekim olıp, o, Qırım yarımadasında tip hadimleriniñ menfaatlarını qorçalay edi – "Ekimler alyansı" zenaat birligine qoşuldı ve "Cıltsız Qırım tibbiyeti" adlı öz leyhasını yapa edi.
İrına Danılovıç beş yaşında olğanda aislesi ile Belarustan Qırımğa köçip keldi. Biraz vaqıt Rusiye ve Belarusta yaşadı, amma soñra Qırımğa qayttı. Qırım.Aqiqatqa intervyü berir eken, ayatını Ukrayina ile añlı tarzda bağlağanını bildirgen edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yılğa apis cazasına makhüm etti. Mahkeme qadınnı Rusiye Ceza kodeksiniñ 222.1 maddesine istinaden «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını ödemeli.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Rusiye apsinde tutulğan qırımlılar
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisovanıñ kâtibiyeti 2020 senesi noyabr ayında Rusiye tarafından siyasiy sebeplerden taqip etilgen insanlarnıñ sayısı 130 ola, dep bildirgen edi.
Qırım aq qorçalayıcı gruppasınıñ malümatına köre, 2020 senesi oktâbr ayınıñ soñuna qadar eñ az 110 kişi Qırımda siyasiy sebepli ya da diniy cinaiy taqipler çerçivesinde azatlıqtan marum etildi.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
