Türkiyede üç muhalifet firqası prezident saylavlarından şimdiki devlet yolbaşçısı Recep Tayyip Erdoğannıñ namzetini çıqarmağa talap ete. Yüksek saylav komissiyasına itirazlarını İyi Parti, DEVA Partisi ve Memleket Partisi yolladı.
Muhalifet Erdoğannıñ esas raqibi Kemal Kılıçdaroğluna qoltuta. Muracaat müellifleriniñ fikirince, şimdiki prezidentniñ namzet kösterilmesi Türkiye Anayasasına zıt kele, çünki ekinci kere prezidentligini yapa. Akimiyet ise 2017 senesiniñ anayasa referendumından soñ Erdoğannıñ prezident müddeti sıfırlandı, dep bildire. Türkiyede prezident saylavları mayısnıñ 14-nde keçirilecek. Fevralniñ başında olğan ve 50 biñden çoq insannıñ ölümine sebep olğan yer teprenüvlerine baqmadan, saylavlarnıñ vaqtı deñiştirilmedi.
Qurtarıcılar ve tibbiyet hadimleri yeri. Hatayda zelzele aqibetleri
Erdoğan ve Kılıçdaroğlu – prezident yarışınıñ favoritleridir. Olarnıñ kampaniyalarında zelzele mevzusı esas yer aldı. Muhalifet prezident Erdoğannı yer teprenüviniñ aqibetlerini yoq etüvge azırlıqsız olğanında ve zarar körgenlerge yeterli yardım kösterilmegeninde qabaatlay. Yaqında keçirilgen soravlar muhalifet namzeti şimdiki prezidentten daa çoq rey ala bile, dep köstere. İçtimaiyatçılarnıñ bir qısmı eki namzetke berilgen reylerniñ sayısı teñ ola bile, dep tüşüne.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
