Fevralniñ 9-nda Türkiyeniñ eñ büyük limanlarından biri Hataynıñ İskenderun ilçesinde yanmağa devam etti. Kontrol altına alınğanı bildirilse de, ateşni bütünley söndürip olamaylar – himik maddeler tolu konteynerler yana, iriy ve ateş tarqala.
Bundan ğayrı, İskenderunda suv seviyesi köterildi, soqaqlarnı suv bastı. İnsanlar tahliye etildi ve vaqtınca qave, mektep ve alış-veriş merkezlerinde yerleştirildi.
Hatayda qurtaruv işleri devam ete – insanlar ümütlerini coymayıp, yaqınlarını sağ körmege isteyler. Antakya şeerinde bazı soqaqlar yernen bir oldı. Biñlernen insan yıqılğan binalar altında qala.
Türkiyeniñ cenüp-şarqında ve Suriyeniñ işmalinde fevralniñ 6-na keçer gecesi 7,8 küçünen zelzeleler oldı.
