Türkiye Tış işler naziri Mevlüt Çavuşoğlu «Qırım platformasınıñ» sammiti başlamazdan evel jurnalistlerge Ukraina ile işbirligi quvetleşkenini bildirip, oktâbr ayında memleketke kelecek, dep ilân etti.
«Dost Ukrainanıñ prezidentini bu tedbir munasebetinen tebrikleyim. Türkiye ve Ukraina munasebetlerinde bir problem yoq, aksine. Qalğan bütün saalarda munasebetlerimizni pekitmek içün çalışamız. Oktâbr ayında Ukrainağa kene kelip, zenaatdaşım, Ukraina Tış işler naziri Dmıtro Kulebanen strategik planlaştıruv grappasınıñ toplaşuvlarını keçirecem», – dep bildirdi Mevlüt Çavuşoğlu.
Hatırlatamız, Türkiye prezidenti Recep Tayyip Erdoğan Ukraina prezidenti Volodımır Zelenskıynen telefonda laf etip, «Qırım platformasına» qoltutacaq, dep işandırdı.
Ukraina Tış işler naziri Dmıtro Kuleba «Qırım platformasınıñ» semereligini quvetleştirmek içün diger halqara formatlarnen, hususan Birleşken Milletlernen koordinatsiya ve işbirligi planları aqqında bildirdi.
Onıñ qayd etkenine köre, «Qırım platformasınıñ» açılış sammitinde memleketni temsil etken vekâletliniñ seviyesi emiyetli degil, çünki bütün iştirakçilerniñ vazifesi aynı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
