Link açıqlığı

Saatnıñ esas haberi

Türkiye prezidenti Zelenskıynı «Qırım platformasına» qoltutacaq, dep işandırdı


Volodımır Zelenskıy (soldan) ve Recep Tayyip Erdoğan (sağdan)
Volodımır Zelenskıy (soldan) ve Recep Tayyip Erdoğan (sağdan)

Türkiye prezidenti Recep Tayyip Erdoğan Ukraina prezidenti Volodımır Zelenskıynen telefonda laf etip, «Qırım platforması» sammitinde Türkiyeni Tış işler naziri temsil etecek dep bildirdi, ve ileride bu meydançıqqa qoltutacaq, dep işandırdı, dep haber ete Ukraina Prezidenti ofisiniñ matbuat hızmeti.

«Eminim, Qırım platforması qanunsız işğal etilgen Qırımnı qurtaruv işinde faydalı bir alet olacaq», – dep bildire Erdoğannıñ aytqanlarını müessiseniñ matbuat hızmeti.

Ukraina prezidenti Erdoğanğa muracaat etip, Rusiyede tutulğan 100-den çoq qırımtatar siyasiy mabüsini azat etmege yardım etmesini rica etti.

Hatırlatamız, Almaniya kantsleri Angela Merkel Ukraina ziyaretiniñ neticelerinen bağlı matbuat konferentsiyasında «Qırım platforması» sammitine ne içün qalıp olamaycağını añlattı.

Almaniyanıñ Ukraina elçisi Anka Feldhusen, Almaniya tış işler federal naziri Heiko Maas Afğanistandaki adise-vaqialar sebebinden «Qırım platforması» sammitinde iştirak etip olamaz, onıñ yerine Almaniyanı iqtisadiyat ve energetika federal naziri Peter Altmaier temsil etecek, dep bildirdi.

Ukraina Tış işler naziri Dmıtro Kuleba «Qırım platformasınıñ» semereligini quvetleştirmek içün diger halqara formatlarnen, hususan Birleşken Milletlernen koordinatsiya ve işbirligi planları aqqında bildirdi.

Onıñ qayd etkenine köre, «Qırım platformasınıñ» açılış sammitinde memleketni temsil etken vekâletliniñ seviyesi emiyetli degil, çünki bütün iştirakçilerniñ vazifesi aynı.

«Qırım platforması» halqara sammiti 2021 senesi avgustnıñ 23-nde Ukraina Mustaqilliginiñ 30 yılı munasebetinen ötkerilecek.

Bugünge qadar Ukrainadan ğayrı 45 memleket ve halqara ve devletlerara teşkilât «Qırım platforması» sammitinde iştirak etecegini tasdıqladı.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

«Qırım platforması»

Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.

XS
SM
MD
LG