Er yaz, Yedi Quyu (Leninskiy) rayonınıñ Mama (Kurortnoye) köyünde, Çoqraq gölüni deñiz körfezinden ayırğan yer parçasına oba-oba raatlanıcılar kele.
Turistler, çoqraq çamurlarınen "tedaviylenmege" istep keleler. Tarihçiler aytqanlarına köre, bu çamurlar qadimiy antik zamanlardan berli öz şifalı küçünen belli. Yerli sakinler ise, bütün hastalıqlardan qutulmaq ümüdinen üstlerine baştan-ayaq çamur şıqlağan turistlerge felsefiy nazarnen baqa.
Keriçniñ yanında yerleşken Çoqraq gölü öz şifalı çamurlarınen belli. Gölniñ rapası (pek qoyulaştırılğan tuz irintisi) ve çamurını, adale-iskelet sistemasınen ve siñir sistemasınen bağlı hastalıqlarnı yahşı etmek içün qullanalar. Tamam şifalı çamurlar er yıl turistlerni celp ete, olarnıñ çamur ile bulaşqan bedenleri uzaqtan körüne.
Mama köyünde meskenni ödep olamağanlar (böyle soyları ise soñki vaqıtları ep artmaqta), çalılar tübünde yerleşe. Olar çeşit-türlü çadırlarda yaşay - sade çarşaflı saçaqlardan başlap, paalı çadırlar ve kemperlerge qadar.
Ve tabiiy ihtiyaclarnı da, ebet, ya da çegerler tübünde, ya da plönka ya da çadır basmasından yapılğan muvaqqat keneflerde yerine ketireler.
İşte, kene mında, çalılar tübüne, çöplük de atalar. Çoqusı bütün qorantalarınen "şifalanıp", sıq-sıq böyle çöplükte yaşay.
Raatlanuv şaraitleri medeniyetli demege qıyın. Çoqraqqa, çoqusı alda, "kiyik turizm" şaraitinde yaşamağa azır olğanlar kele. Eñ yaqın tükân - Mama köyünde: bu yıl köyde eki tükân ve bir qaç alış-veriş çadırı çalışa. Çoqraq gölü yanında lager qurğanlarnıñ çoqusı, gaz yanğıçlarında ya da ateşte aş baqa.
Küneş energiyasını alğanlar da bar. Amma olar azlıqta.
Mamağa barıp çıqmaq içün, turistlerge bir kilometrge yaqın keçmek kerek. Maşnanen de barmaq mümkün, amma köygece yol pek yaramay, yağmurlardan soñ ise o yuvula ve yengil maşnanıñ keçmege çare yoq.
Yerli sakinler bu arada fırsatnı coymayıp, küçük biznes teşkil ete: Çoqraq yanında pişken mısırboğday ve içimlikler satalar, istegenler ise motodeltaplanda yüre bile.
Söz sırası, yerliler Çoqraq çamurlarınıñ şifalı olğanını çoqtan bile, amma ep bir baştan-ayaqqa oña bulaşıp, o küneşte qurıp qalmağance yürmege avesleri yoq.
Çoqraq gölüniñ çamurlarını, adale ve buğumlarda ağırları olğanlar qızdırğan kompress kibi qullana.
Vasıl Korçev, keriçli Qırım blogeri
«Bloglar» rubrikasında bildirilgen fikir-tüşünceler müelliflerniñ noqtaiy-nazarını bildirip, muarririyetniñ baqışları ile aynı olmaması mümkün