Yanvarniñ 8-inde Tegeran ava limanından çıqqan ukrain uçaqnı İran raketasınen uruldı. Bunı yanvar 9-ında matbuat konferentsiyasında Canada baş naziri Justin Trudeau (Castin Trüdo) haber etti.
"Elimizde olğan malümat, uçaqnı "yer-ava" İran raketası urğanını köstere. Bu tesadufen ola bilgen. Yañı malümat adiseniñ er taraflı tahqiq etilüviniñ ihtiyacını aydınlata. Canada, bu facialı qazanıñ sebeplerini bilmek içün ortaqlarınen çalışa", - dedi Trüdo, dep haber ete Azatlıq Radiosı.
Yanvar 9-ında aqşam bir sıra çetel matbuatı, "Ukraina halqara ava yolları" şirketiniñ Tegeran-Kyiv Boeing uçağı yanvarniñ 8-inde İran raketa darbesinen urulğanınıköstergen malümatnı derc etti.
The New York Times Amerika neşiri İranda Ukraina uçağına endirilgen raketa darbesiniñ videosını kösterdi.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Ukraina Tış işler naziri Vadım Prıstayko, İrannen Ukraina uçağınıñ qazasını tahqiq etüv ve onıñ sebeplerini ögrenüvde eki memleketniñ tahqiqat gruppalarınıñ koordinatsiyası aqqında añlaştı, dep bildirdi.
Ukrainada yanvarniñ 9-nda İrandaki uçaq qazası sebebinden matem künü olaraq ilân etildi.
