The New York Times Amerika neşiri İranda Ukraina uçağına endirilgen raketa darbesiniñ videosını kösterdi.
«Raketa uçaqnı urğanda küçük bir patlav oldı, amma uçaq patlamadı, bunı video köstere. Uçaq bir qaç daqqa daa uçmağa devam etti ve ava limanı tarafına aylandı, dep ögrendi The Times. Uçaq patlamaq ve tez tüşmekten evel alevde ava limanına uçtı, dep köstere The Times teşkergen diger videolar», – dep yaza jurnalistler, haber ete Azatlıq Radiosı.
Kanada baş naziri Justin Trudeaunıñ yanvarniñ 9-nda bildirgenine köre, yanvarniñ 8-nde Tehran ava limanından çıqqan Ukraina halqara ava yolları şirketiniñ uçağı İran raketası tarafından tüşürildi.
Bir sıra kütleviy haber vastası, Ukraina halqara ava yollarınıñ uçağı İranda tüşürildi, dep malümat berdi.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Ukraina Tış işler naziri Vadım Prıstayko, İrannen Ukraina uçağınıñ qazasını tahqiq etüv ve onıñ sebeplerini ögrenüvde eki memleketniñ tahqiqat gruppalarınıñ koordinatsiyası aqqında añlaştı, dep bildirdi.
Ukrainada yanvarniñ 9-nda İrandaki uçaq qazası sebebinden matem künü olaraq ilân etildi.
