"Toqtamaycam". Bogdan Ziza Rusiyede apis etilgen siyasiy mabüslerniñ oğrunda küreşe

Kezlevli ressam Bogdan Ziza açlıq aktsiyasını toqtattı, dep bildirdi tuvğanları. Ukrayinadaki büyük cekke qarşı aktsiya keçirgeni içün Rusiyede apis czeası mahküm etilgen qırımlı Rusiye apishanelerinde tutulğan ukrayinalı siyasits mabüslerniñ taqdirine diqqat çekmege tırıştı. Bir aydan az müddetke dayana bildi, amma ailesi Bogdan maqsadına irişkenine emin.

Bogdan Ziza iyünniñ başında Rostov-na-Donu Cenüp daire arbiy mahkemesi onı 15 yıl apis cezasına mahküm etken zaman açlıq aktsiyasını ilân etti.

Kezlevli Bogdan Ziza, Qırımda öz siyasiy aktsiyasını keçirgen soñ yaqanlanğam ve tevqif etilgen edi. Artıq bir yıldan ziyade o tevqifli edi. İyünniñ 6-nda Rusiyeniñ Rostov-na-Donu şeerindeki Cenüp bölge arbiy mahkemesi onı Rusiye Ceza Qanunnamesiniñ dört maddesi ile qabaatlı tanıdı: 205 maddesi 1-nci qısmı (terror eylemi), 205 maddesi 2-nci qısmı (terror eylemini yapma tehditi), 205.2 maddesi 2-nci qısmı (terror eylemine çağıruv), 214 maddesi 2-nci qısmı (siyasiy sebeplerden vandallıq).

Qabaatını o tanımay. Onıñ sözlerine köre, "o terrorist degil, başqasınıñ ayatını alacaq birisi degil de, aksine başqası içün öz ayatını berecek birisidir".

Üküm ilân etilmezden evel mahkemede soñki sözünde Ziza bütün ukrayinalı siyasiy mabüslerniñ azat etilüv talabı ile açlıq ilân etti.

"Men, Ziza Bogdan Sergeyeviç, Ukrayina vatandaşı olaraq, açlıq ilân etem. Menim talabım - RF vatandaşlığından red etilmemni ve bütün ukrayin siyasiy mabüslerniñ azat etilmesini isteyim", - dep ayttı Ziza.

"Er şey azap yolu ile elde etile"

Açlıq aktsiyanıñ 17 künü içinde Ziza 10 kilo azdı ve daa sert nezaret altında ayrı kamerağa avuştırıldı.

"Quvetçizlik öz tesirini köstere, eñ çoq qol ve ayaqlarda is etile. Er bir areketten baş aylana. Yataqtan aman-aman turmayım, kezintilergen de siyrek çıqam. Yalıñız suv içem. Soñki künler istemeden içem, amma kerek. Yaramay yuqlayım, sıq-sıq uyanam, kündüz yuqlamağa tırışam, gece yañğızlıqnı keçirmek daa qıyın", - dep yazdı Ziza öz soñki mektübinde.

Açlıqnıñ 17-nci kününde sağlıq alı sebebinden açlıqnı toqtatmağa mecbur edi.

Qırımlınıñ tuvğanları bunıñ aqqında SİZO müdiriyetinden mektüp alğan advokattan bildiler. Zizanıñ sağlı alı ne olğanı şimdilik belli degil, çünki onı alâ daa ayrı tutalar. Bunı Qırım.Aqiqatqa ressamnıñ eki doğmuş tatası Aleksandar Barkova aytıp berdi. O, ÇVK "Vagner"niñ "Moskvağa seferi" vaqtında Bogdan ile alâqa bir müddet tamamınen kesilgenini ayttı.

"Vagnerler" Rostovğa kirgende yerli SİZO ile er angi alâqa üzüldi. Anda apishanelerni açqanları ve mabüslerni Moskvağa ketmege davet etkenlerini aberderden oqudıq. Şu vaqıt biz pek qasevet ete edik, çünki Bogdannıñ taqdiri aqqında bir şey belli degil edi. O künü açlıqnıñ 15-nci künü edi, o pek zayıf edi, yataqtan turmaq bile küçü yetmey edi", - dep bildirdi o.

Açlıq aktsiyasınıñ başlamasından soñ Bogdan Ziza apishaneden mektüp yibergen. Mektüpte o, maqsadınıñ irişilmez olğanını itiraf ete. Şunıñ içün onıñ vazifesi siyasiy mabüslerniñ meselesine diqqat çekmek edi ve o bunı becere bildi, dep saya Aleksandra Barkova.

"Rusiyeniñ Ukrayinağa qarşı devam etken büyük cenk şaraitinde siyasiy mabüslerniñ deñişüv meselesi pek mürekkepleşken. Soñki yıllar adamlarımız cezasını bütünley çekip azatlıqqa çıqa. Ve bu qorqunçtır. Bogdan 15 yıl apis cezasına mahküm etilgen. Bizim içün bu qabul etilmez. Siyasiy mabüslerniñ deñişüv mevzusı kün tertibinde olması içün küreşecekmiz. Bogdannıñ esas maqsadı siyasiy mabüslerniñ deñişüv meselesine diqqat celp etmek edi. Ve o bunı becere bildi. Bunı şimdi ğayıp etmemiz kerek. Ne yazıq ki, bu onıñ azap çekmesi ile irişile", - dep qayd etti tatası.

"Elimden kelgen er şeyni yapqanımnı añlaycam"

Bogdan özü de Rusiyedeki rejim şaraitinde açlığınıñ maqsadı irişilmez olğanını añlay. Amma aktsiyasınıñ siyasiy mabüslerniñ aza etilmesi içün müim olğanına inana.

"Er kes menim açlığım kimsege kerek degil, er keske epsi bir olğanını isbatlamağa tırışa. Er kes onı toqtatamğa qandıra, amma men bu müim olmağanını añlatmaqtan boldurmayım... Talaplarım şimdi ve mında irişilmez dir, amma menim maqsadım o degil. Eñ esası siyasiy mabüslerniñ meselesine diqqat çekmektir. Oturıp, bunıñ özü çezilecegini, menim yerime birisi yapacağını beklemek menim içün qıyındır", - dep yazdı Ziza.

Kreml sabıq siyasiy mabüsi Volodımır Baluh da Qırım SİZO-sında tutulğanda narazılıq bildirip açlıq ilân etken edi. Neticede Ukrayina ve dünya toplulığı deñişüvge irişip olğan ve qırımlı azat etilgen edi.

Volodımır Baluh, "duşmannıñ topraqlarında" er angi maqsatqa irişüv qıyındır dey. Amma siyasiy mabüslerniñ destegine er bir aktsiya müimdir.

Bogdan Zizanıñ ailesi, siyasiy mabüslerniñ deñişüv meselesi Rusiye ve Ukrayina arasında arbiylerniñ deñişüv esnası ile bir sırada olmalı dep saya, çünki olar da "işğal etilgen topraqlarnıñ azat etilmesi oğrunda öz azatlığını ve ömrüni bereler".

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.