180 künden berli müddetsiz açlıqnı devam etken ukrain faali Vladimir Baluh Aqmescit SİZOsında köteklendi.
Qırımtatar Milliy Meclisiniñ reis muavini Ahtem Çiygoznıñ bildirgenine köre, Baluhnı «kameradan çıqarıp, köteklegenler ve öldürmege vade etkenler».
Onı urıp betonğa yatqızğanlar, ayaq, ciger ve başına urğanlarAhtem Çiygoz
«Kamerasına SİZO yolbaşçısı Berejnoy keldi, onen qaba laf etti, soñra kameradan çıqarıp, tiz çökmege talap etkenler. O, istemedi, onı köteklep betonğa yatqızğanlar, ayaq, ciger ve başına urğanlar», – dedi Çiygoz. Onıñ aytqanına köre, faalniñ «başı ve cigeri pek ağıra».
Qırım aq qorçalayıcı gruppası bildirdi ki, ukrain faali Vladimir Baluhnıñ advokatı onı cumaertesi künü, sentâbrniñ 15-nde, ziyaret etecek ola.
Advokat vaziyetni ögrene bilmek içün yarın faalni körmege tırışacaqQırım aq qorçalayıcı gruppası
«Vladimir Baluhnıñ advokatı SİZO nevbetçisinen telefonda laf etti. Nevbetçi advokatnı bir adise olmağanını, şu cümleden Vladimir Baluhnen bağlı bir şey yoq, dep işandırdı. Advokat bundan emin olmaq içün mabüsni körmek kerek, dep bildirdi. Nevbetçi yarın kelip, yolbaşçı izin berse, Vladimir Baluhnı körmege mümkün olur, dep cevap berdi. Vaziyetni ögrenmek içün yarın advokat faal ile körüşmege tırışacaq», – dep yazğanlar aq qorçalayıcılar Facebookta.
Qırım SİZOsında açlıq tutqan ukrain faalini arhiyepiskop Kliment de ziyaret etecek ola.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
Qarşılıq aqibetleri. Baluh taqip etilmege başlağan soñ nasıl deñişti (foto)
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.