Rusiye quvetçileri, aprelniñ 15-inde Yañı Şüli köyünde keçirgen tintüvden soñ, imam Rüstem Abilevni Rusiye FSB-siniñ bölügine ketirdi. Bu aqta Qırım.Aqiqatqa Qırım imayecisi Rüstem Kâmilev aytıp berdi.
“Rüstem Abilevni tutıp aldılar ve FSB-niñ Aqyar bölügine alıp kettiler. Şimdi onen ne olğanı belli degil. Tuvğanları tefsir bermekten vazgeçti ve meseleni özleri çezeceklerini ayttı. Tintüv sanki ya terrorcılıq, ya da ekstremizge çağıruvları içün keçirilgen, dep tahmin etile. Bu türlü maddeler, amma men doğrusını aytıp olamayım. Simdilik bu malümatnıñ bütüni”, - aytıp berdi Kâmilev.
Rusiye quvetçilerniñ bunıñnen bağlı resmiy bir izaat şimdilik yoq.
Aqyarnıñ Balıqlava rayonınıñ Yañı Şüli (Şturmovoye) köyünde Aqyar soq., 48 adresi boyunca aprelniñ 15-nde cami imamı Rustem Abilevniñ evinde tintüv keçirilgen edi. Tahqiqat tedbirleri başta Abilevniñ imamlıq yapqan camide keçirildi, soñra quvetçiler Rustem Abilevniñ evine keldi.
“Qırım birdemligi” teşkilâtınıñ malümatına köe, Rüstem Abiyev tişci ekim olıp çalışa, öz klinikasında hastalarnıqabul ete. 2006 senesi Qırım devlet tibbiy institutını “stomatologiya” bölügini bitirgen.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
