«Qırımlı musulmanlar» davası boyunca mahküm etilgen qırımtatar siyasiy mabüsleri Timur Yalkabov ve Eldar Kantimirov ŞİZOğa qapatıldı. Bir qaç ay evelsi olar Rusiyeniñ Ulyanovskaya vilâyetindeki Dimitrovgrad apishanesine etap etildi. Bu aqta Kantimirovnıñ ömür arqadaşı Elvina Useinova bildirdi, dep haber ete «Qırım birdemligi».
Siyasiy mabüs «Zona-telekom» apishane alâqası vastasınen qorantasınen bağlandı. Kantimirov oña ve aralarında Qırımda mahküm etilgen Timur Yalkabov da olğan odadaşlarına basqı yapıla, dep tarif etti. Olarnıñ kamerasında bir afta içinde üç kere tintüv yapıldı. Tintüv vaqtında qanunsız bir şey tapılmadı, amma bazı şahsiy eşyalar qayd etilmeyip alındı.
«Buña hırsızlıq deyler. Bundan evel namazlıqları alındı, tintüvler sert bir şekilde yapıldı ve tintüv vaqtında hadimler küç qullandı», – dep ayttı Elvina Useinova.
Fevralniñ 9-nda Timur Yalkabov 12 künge ŞİZOğa alındı, soñra anda Eldar Kantimirov da qapatıldı.
Rusiye mahkemesi Kantimirovnı 12 yılğa, Yalkabovnı 17 yılğa üküm etti.
Qırımtatarlar Rusiyede yasaqlanğan, amma Ukrayınada ve bir çoq memlekette sıñırsız areket etken «Hizb ut-Tahrir» teşkilâtınıñ faaliyetinde iştirak etkeninde qabaatlana.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
