Polis, Tifliste (Tbilisi) noyabr 18-inde demonstratsiya dağıtuvı vaqtında 37 iştirakçini yaqaladı. Bunı, Gürcistan İçki İşler Nazirliginiñ malümatına esaslanıp, Azatlıq Radiosı bildire.
Nazirlikniñ malümatına köre, çatışma vaqtında altı adam yaralandı, olardan ekisi - polis hadimleri.
İİN-nde, narazılıq aktsiyasınıñ dağıtılmasını, iştirakçlerniñ "qanundan tış çıqqanları"nen añlattı.
"Avropa Gürcistanı" muhalefet partiyasınıñ lideri David Bakradze ise, "şimdiki akimiyet içün dağıtmanıñ ciddiy neticeleri olacaq", dep ayttı.
Avropa Birligi ve Amerika Qoşma Ştatları, Gürcistan ükümetini, siyasiy firqalarnı ve cemaatçılıqnı, narazılıq iştirakçileri talap etken müddetten tış saylavlarda "raat ve ürmet ile muzakere" keçirmege çağırttı.
Noyabr 18-inde parlament binasını boşatmaq içün berilgen 30 daqqadan soñ, İİN-niñ bir qaç qısmı, muhalefet vekilleriniñ etraftaki soqaqlardan dağıtmasını başladı.
Daa evel bildirile edi ki, Gürcistan polisi, narazılıq aktsiyasınıñ iştirakçilerini suvatqıçnıñ yardımınen dağıta edi ve yigirmige yaqın adamnıyaqaladı, olarnıñ arasında muhalefet firqasınıñ lideri Zurab Caparidze de bar.
Gürcistan parlamenti, mütenasip saylav sistemasına keçmekni red etken soñ, noyabr 14-ünde Tifliste narazılıq aktsiyaları başlandı.
"Gürcistan arzusı" üküm partiyası, evelce vesiqağa qol tutar, dep vade etken edi, amma soñ rey berüvde deñişmelerni qabul etip olamadılar.
