Sentâbrniñ 3-nde tutulğan ve 15 kün apis cezasına mahküm etilgen qırımtatar Eldar Odamanovnı Aqmescitteki muvaqqat tutuv izolâtorından bellisiz yerge alıp ketkenler, şimdilik ne yerde olğanı belli degil.
Bunı "Qırım birdemligi" cemaat birleşmesine Odamanovnıñ ömür arqadaşı Safiye Mamutova advokat Taras Ömelçenkoğa atfı etip bildirdi.
«Saba Aqmescitteki muvaqqat tutuv izolâtorında advokat Taras Ömelçenko Şevket Üseinov ve Eldar Odamanovnı yoqlamaq kerek edi. Anda advokatqa Odamanovnı daa saba alıp ketkenlerini ayttılar, amma tafsilâtlı malümat bermediler. Tahqiqatçınıñ malümatı yoq eken. Odamanovnıñ advokatına da bir şey aytmağan. Aqşam advokat kene müşterisi ile körüşmege tırışqan, amma oña red etkenler», – dep yazıla bildirmede.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Advokat Ayder Azamatovnıñ Qırım.Aqiqatqa bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
