Bu yaz Rusiye akimiyeti ilhaq eitlgen Qırımda imtiyazlı balalarğa, em de "Orlâta Rossii" ve "Birincilerniñ areketi" militarist areketleriniñ azaları içün kütleviy sağlamlaşuvnı temin etmekni niyetlene. Memurlar cebedeki Qırım yarımadasına çoq miqdarda bala putevkalarını satın alalar, anda ise Ukrayina Mudafaa Quvetleri Rusiyeniñ arbiy obyektlerine toqtamadan ücüm eteler. Qırımda kim raatlanmaqnı saylap alğanını Qırım.Aqiqat araştırdı.
Rusiyeli balalarnı Qırımğa raatlanmağa davet eteyatqanda, yerli Rusiye akimiyeti regiondaki arbiy ya da ekologik problemler aqqında iç bir şey aytmay.
Rusiye turistlerine soñki aylarda Ukrayina Mudafaa Quvetleri tarafından Qırımdaki Rusiye arbiy obyektlerine qarşı dron ücümleriniñ sıqlığı artqanını, yerli yalılarda rast kelmege devam etken taze lokal mazut tökülüvi aqqında da, bölgedeki yaqıcı inqirazı aqqında da aytılmay.
Bu allar Rusiye akimiyetiniñ imtiyazlı balalar içün Qırım yalısına akimiyetten putevkalarnı satın aluvnı lâğu etmege esas degil eken.
Biñlernen bala içün Qırımda raatlıq
Bu yaz Qırımda tahminen 200 biñ Qırım balasına raatlanuv, sağlıqnı yükseltüv ve kurort tedaviyleviniñ er bir çeşitini temin etmege planlaştırıla, dep bildirdi Sergey Aksönov.
Bundan ğayrı, onıñ aytqanına köre, Ukrayinanıñ Zaporijjâ, Herson, Donetsk, Luğansk vilâyetlerinden ve Rusiye Federatsiyasınıñ Kursk vilâyetlerinden Rusiye işğal ettken territoriyalarından 1150 bala bölgeniñ esabına yaz tatiline ve sağlamlaşuvğa qabul etilecek.
Bu yaz bala raatlıq ve sağlıq müessiseleri deyerlik bütünley tolacağı beklenile, dep haber eteler Qırımnıñ Rusiye başlıqları.
"Qırım er yıl Rusiye Federatsiyasınıñ başqa bölgelerinden balalarnı teşkil etilgen raatlıq ve sağlıqnı yükseltmek içün qarşılay. Şimdiki vaqıtta balalarnıñ sağlığını yükseltmek içün köy lagerlerinde yerleşüvniñ ölçüsi 90-ğa qadar olacağı tahmin etile. Tümrn, Kursk şeerlerinden de kelecekler. Peterburgnı biraz coydıq, amma ümüt etem ki, vaziyet deñişir", — dedi jurnalistlerge Aleksandra Şeluhina, ilhaq etilgen Qırımnıñ ilim ve yaşlar nazirliginiñ qoşma tasil, tasil işi, raatlıq ve sağlıqnı yükseltüv bölüginiñ müdiri.
Onıñ sözlerine köre, Qırımda bücet paralarından faydalanıp, istidatlı balalar içün ve "Orlâta Rossii" ve "Dvijeniye pervıh" Rusiye arbiy areketleriniñ iştirakçileri içün de 28 ihtisaslaştırılğannevbet planlaştırıla.
Balalarnıñ seyaat paketleri içün millionlar
Qırım.Aqiqat Rusiye devlet satın aluvlar portalından malümatnı teşkerdi ve Rusiye akimiyeti bu sene Qırımda imtiyazlı balalar içün sağlıq putövkalarına on millionlarnen ruble sarf etkenini taptı.
Tender şartlarında Rusiyeniñ Ukrayinağa keñ kölemli basuvı neticesinde cebe bölgesinde peyda olğan arbiy telükeler aqqında iç bir şey aytılmay. Lâkin olarda, umumen, balalar raatlanuv yerleri felâketli vaziyet ilân etilgen regionlardan tış yerleşmek kerekligi közde tutula. Lâkin bu yerde mahsus Qırım yalısınıñ mazutnen kirlenmesi sebebinden peyda olğan felâket aqqındamı ya da arbiy telükeler aqqındamı aytılamı, belli degil.
Sankt-Peterburg memuriyeti 2026 senesi mekteplerniñ yaz tatilinde Qırımda Qara ve Azaq deñizleri yalılarında raatlıqnı teşkil etmek içün hızmetlerniñ büyük alış-verişlerini yapa. Rusiyeniñ devlet satın aluvlar portalınıñ malümatına köre, şeerniñ akimiyeti bu hızmetlerge bu sene on millionlarnen ruble sarf etti.
Rusiyeniñ Hantı-Mansiysk şeeriniñ akimiyeti Qırımğa bir qaç million rublelik bala putevkalarını satın aldı. Olar imtiyazlı balalarnı Bağçasaray rayonınıñ Pesçanoye köyüne sağlıqlarını tüzetmek içün yaz tatilinde yollamağa planlaştıralar.
Rusiyeniñ ükümet satın aluv portalınıñ malümatına köre, Oraq ve Arman aylarında Qırımda Qara deñiz yalısında balalarnıñ raatlıqlarını teşkil etmek ve olarnıñ sağlığını tüzetmek içün Tomsk vilâyetiniñ akimiyeti tarafından aman-aman on million ruble sarf etildi.
Rusiyeniñ Volgograd vilâyetinden kelgen DTSP ve ağır adale-taqlet bozuqlıqları olğan balalarnıñ Qırımnıñ Qara deñiz yalısında 2026 senesi küzge qadar tedaviylenmesi planlaştırıla.Regional akimiyet olarğa putevkalar içün bir qaç million ruble sarf etti.
"Vaziyet stabil"mi?
Rusiye akimiyetini böyle alış-veriş yapmaqtan tek arbiy telükeler ve Rusiyeniñ Ukrayinağa keñ kölemli cenk köntekstinde Qırımda daa beterleşken yaqıcı inqirazı degil de, Qırım yalısında yañı mazut tökülgeni aqqında haberler de çetke çekmey.
Rospotrebnadzornıñ Qırım bölüginiñ başı Natalya Penkovskaya mazut ile bağlı er angi bir telüke olğanını red ete. Onıñ aytqanına köre, agentlik mütehassısları Qırım suvlarında qum ve deñiz suvunı teşkerdiler ve şübeli bir şey tapmadılar.
"Şimdiki vaqıtta Qırımda neft mahsulatlarınıñ monitoringini arttırmaq ya da keñleştirmek içün iç bir esas yoq. Biz tek er angi bir büyüklikteki telüke tahmin etilgende cevap berecemiz. Şimdiki vaqıtta Qırımda vaziyet stabil. Biz deñizniñ bu qısmında iç bir telüke körmeymiz", — dedi o.
Umumen, Qırım yalı boyunda deñiz suvunıñ keyfiyetinde iç bir türlü suv kirlenüvi yoq, dep bildirdi Rospotrebnadzornıñ Qırım idaresiniñ başı.
Rusiye ve Ukrayina arasında devam etken arbiy areketler şaraitinde bu malümatnı tasdıqlamaq mümkün degil.