İran vatandaş aviatsiyasınıñ idare yolbaşçısınıñ bildirgenine köre, İran, yanvarniñ 8-nde tüşken Ukraina uçağınıñ qara qutusını «Boeingge» bermeycek. Bu aqta Mehr İran resmiy haber agentligi yaza, dep bildire Azatlıq Radiosı.
Reuters agentligi devlet televideniyesiniñ malümatına esaslanıp bildirgenine köre, uçaqnıñ eki qara qutusı tapıldı.
Adı aydınlatılmağan memurnıñ aytqanına köre, eki qutu da zarar kördi, amma malümat alına bile.
Ukrainanıñ «Boeingi» yanvarniñ 8-nde Tehran ava limanından çıqıp birden tüşti. Sağ qalğanlar olmadı. İran naqliyat nazirligi, çıqqan uçaqnıñ köçüricilerinden biri yanıp başladı, dep bildire. Ukraina Milliy telükesizlik ve mudafaa şurası, elâk olğanlar arasında 11 Ukraina vatandaşı bar edi, dep bildirdi.
«Ukraina halqara ava yollarına» ait uçaq qazasınıñ sebepleri ögrenilgenine qadar Ukraina ava şirketlerine İranğa uçuş kerçekleştirmesi yasaq etildi. Bir çoq dünya ava şirketi, ABD ve İran arasında kerginlik artqanı içün telükeli ola bilecek topraqlar üzerinden uçmamaq içün uçuşlarınıñ yolunı deñiştire.
