Ukraina, Qırımnıñ işğali ve Donbastaki çatışma sebebinden ABD ve Avropa memleketleri Rusiyege tazyıqnı quvetleştirecegine ümüt ete. Bunı «Ukrinform» agentligine intervyü vaqıtnda Ukrainanıñ ABD-deki elçisi Okasan Markarova bildirdi.
Ukraina ğarp ortaqlarından nasıl destek beklegeni aqqında sualge «azamiy tazyıq» ve «sanktsiyalar arttırıluvı», dep cevap berdi Markarova.
«Tecavuzcı areketlerini deñiştirmegence Rusiye içün Ukrainağa qarşı tecavuznıñ fiyatı ep artmaq kerek», – dedi o.
Ayrıca o, Ukrainanıñ NATOğa qoşulmasınıñ ve Ukraina Silâlı Quvetleriniñ arbiy qudretiniñ artması içün Ğarp yardımınıñ müimligini qayd etti.
«Prezident Joe Bidenden ABD Ukrainağa daa ziyade yardım etmege azır olğanını eşittik, şu cümleden silâlar da. Menimce, ABD ile ekitaraflı işbirlik içün çoq fırsatımız bar. Bu ordumıznı quvetleştirmek ve Qara deñiz bölgesinde telükesizlikni temin etmek içün pek kerek», – dep saya elçi.
Fevralnıñ 25-nde Ukraian prezidenti Volodımır Zelenskıy Oksana Markarovanı Ukrainıñ ABD-deki elçisi vazifesine tayin etti.
ABD prezidenti Joe Biden, Qırımnıñ Rusiye işğaline qarşı tirenüv kününe bağışlanğan bildirmesinde Vaşington Ukraina Qırımınıñ Rusiye tarafından işğaline iç bir vaqıt ray olmaz, dep bildirdi.
Amerikanıñ Devlet kâtibi Entoni Blinken, ABD Rusiyeni Qırımnıñ işğalini toqtatmağa çağırğanını bildirdi.
Prezident ofisi Ukraina devlet başınıñ ABD prezidenti Joe Biden ile körüşüvini ve telefondan qonuşmasını azırlay. Kyiv Donbasta vaziyetniñ tınç çezilmesi ve Qırımnıñ işğalden azat etmesi ile bağlı aytışmalarğa ABD-ni daa ziyade celp etmek içün çalışacaq.
2020 senesi oktâbr ayında ABD diplomatları Qırımnı işğalden qurtaruv platformasını qurmaq içün Kyiv ile işbirligi yapmağa azır, dep bildirgen edi.
2018 senesi iyülniñ 25-nde o vaqıt ABD devlet kâtibi olğan Mike Pompeo Amerika Birleşken Devletleri Rusiyeniñ Qırım ilhaqını iç bir vaqıt qabul etmeycegi aytılğan «Qırım beyannamesini» çıqardı. Pompeo, ABD Ukraina topraq bütünliginiñ ğayrıdan tiklenmesini kene israr etecek, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
