İyül 31-inde saba erte "Tavrida" trassasında yol qazası oldı, onda sekiz adam elâk oldı. Bunı Qırımnıñ rusiyeli akimiyetiniñ FVN-niñ matbuat hızmeti bildirdi.
"İlk alınğan malümatqa köre, "Tavrida" trassasında Aqmescitke taraf ketken "Mercedes Sprinter" mikroavtobusı, arabalı KAMAZ maşnasına barıp uruldı. Mikroavtobusta 15 adam bar edi. Yol qazası neticesinde 8 adam yaralanıp elâk oldı", - denile beyanatta.
Qırım İİN-nde, yol qazası neticesinde teşkerüvni yapqanlarını bildireler. Qırım ve Aqyar boyunca rusiyeli Tahqiqat komitetiniñ hadimleri de öz teşkerüvini keçire.
"İnterfaks"nıñ malümatına köre, qazada yaralanğan dört adam arasında yüklü qadın bar.
"Hastahanemizge dört adam qoyuldı. Episi orta alda, 18 yaşında bir yüklü qız bar",- dedi Qarasuvbazar rayonı memuriyetiniñ başı Galina Pereloviç agentlikke.
Çarşenbe künü, iyül 15-inde, Aqmescit-Kezlev yolunda Opel Vectra ve Škoda Octavia çatıştı. Bir adam yaralandı.
Aqmescitte iyül 3-ünde yol qazası neticesinde Trolleybusnaya soqağında maşna yandı.
İyün 30-ında "Tavrida" trassasında Yedi Quyu rayonında Çuqul (Vinogradnoye) köyünde eki yük maşnası çatıştı.
Qırımda Seyit Eli (Juravki) köyü ve Curçı (Pervomayskoye) qasabasınıñ arasında "Tavrida" trassasında yol qazası oldı, Hyundai yük maşnasınıñ aydavcısı elâk oldı.
