"Tavrida" trassası bazar künü, avgust 4-ünde, qararnen saat 15:00 Kefe tarafına maşnalarnen tıqaldı. Aydavcılarnıñ aytqanına köre, o, Bagerovo köyüniñ burulışından Fontan köyünece uzandı. Bu tahminen 20 kilometr, dep bildire yerli Kerch.FM saytı.
"Tıqanıqlıq büyükten-büyük, videoda onıñ tek bir qısmı körüne. Kimer yerlerde maşnalar ekiser sıra tura", - dep yaza matbuat yolcularnıñ sözlerinden.
Kerch.FM, maşnalardan birisiniñ video registratorından tıqanıqlıq videosını derc etti, onda yengil maşnalarnıñ arasında bayağı yük maşnaları rastkelgeni de körünip tura.
Daa evel Qırımnıñ rusiyeli akimiyeti "Tavrida" trassasında yük maşnalarnıñ yürmesini yasaqlağanına baqmadan, olar bu yolnıñ kimer qısımlarında yürmege devam ete. Yasaqlayıcı işaretler Qarasuvbazar (Belogorsk) şeeriniñ burulışı ögünde qoyulğan. Olarğa köre, yük maşnalarına "Tavrida" trassasında yürmege yasaq, olar eski Aqmescit-Kefe yolunda yürmeli.
Yañı "Tavrida" trassasına, sıq-sıq olğan qazalar içün "ölü yolu" deyler.
Rusiye ükümeti "Tavrida" avtomobil trassasınıñ qurulışını 2022 senesi bitirmege niyetlene.
