Qırımda 70 yaşında Canköy sakinine Rusiye ordusını «itibardan tüşürgeni» içün eki kere para cezası berildi. Bu aqta Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva bildirdi.
Onıñ aytqanına köre, bu malümat Rusiye mahkeme cedvelinde bar.
«Anda Rusiye kodeksiniñ bir qaç maddesi bar, amma Qırımda Rusiye işğaline tirengen insanlarnıñ çoqusı 20.3.3 maddesine istinaden memuriy mesüliyetke çekile. 20.3.3 maddesine istinaden 50 biñ ruble para cezası aqqında 2 qarar çıqarılğan Canköy rayonınıñ 70 yaşında sakini qomşularnıñ araba qapusını boyalağanı içün ceza aldı», – dep aytıla haberde.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Aq qorçalayıcılarnıñ malümatına köre, Qırımda 186 siyasiy taqip qurbanından 110-u qırımtatarı ola, Rusiye uquq qoruyıcıları keçirgen tintüvlerniñ 75%-ı qırımtatarlarnıñ evlerinde ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
