Ukraina Tış işler naziriniñ birinci muavini Emine Ceppar Qırımdaki Rusiye qabaatlavınıñ Qırımda ğıyabiy şekilde mahküm etilgen Qırımtatar Milliy Meclisiniñ reisi Refat Çubarovnı 9 yılğa azatlıqtan marum etmek talabını «siyasiy qorquzuv» dep adlandırdı. Qırımda Meclis reisi 2014 senesi fevralniñ 26-nda Qırım parlamentiniñ binası ögünde «qalabalıqlarnı teşkil etkeninde» qabaatlana.
«Qırımnıñ tamır halqına qarşı qorquzuv ve basqı siyaseti yapıla. Qırımtatar Milliy Meclisiniñ reisini Qırımnıñ Rusiye işğaline qarşı tirengeni içün ğıyabiy şekilde «sahte mahkemege» oğratqan Rusiye işğalcileri onı 9 yıl koloniyada qalmasına üküm etecek ola», – dep yazdı Ceppar Twitterde.
Rusiye kontrolindeki Qırım Yuqarı mahkemesiniñ oturışuvında mayısnıñ 24-nde qabaatlav Çubarovnı 9 yılğa apiske almağa rica etti. Devlet qabaatlayıcısı mahkemede «Çubarovnıñ qabaatı zarar körgenler, şaatlarnıñ şaatlığınen ve diger delillernen» isbatlandı, dep bildirdi.
Refat Çubarov Rusiye qabaatlavınıñ talabını Qırım.Aqiqatqa izaatladı. Üküm iyünniñ 1-nde çıqarılacaqtır.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
