Qırımtatar Milliy Meclis reisi Refat Çubarov Qırım.Aqiqatqa mayısnıñ 24-nde qabaatlav tarafı oña 9 yıl apis ceasını istemesini tefsir etti. Çubarov, Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv) binaen qabaatlana.
«Maña, milliy liderimiz Mustafa Cemilev, Lenur İslâmovğa qarşı açılğa bütün bu davalar, tezden kerçek cinayetçilerge, sahte ve qanunsız areketlernen cinayetçilikni gizlemege tırışqanlarğa qaytacaq», – dedi Çubarov.
Onıñ aytqanına köre, Qırımdaki Rusiye prokurorınıñ bildirmesi «bizim ayatımıznı deñiştirmez».
«Menim içün bu, iç bir şekilde ne ayat tarzını, ne de Qırımnıñ işğalden azat etilmesi oğrundaki küreşimizni deñiştirmey. Bu yerde apis cezalarına mahküm etilgen, tevqif etilgen ve şimdi Rusiye apishanelerinde bulunğan qırımtatarlar, qavmiy ukrainler aqqında tüşünmelimiz», – dedi Meclis reisi.
Mayısnıñ 24-nde Rusiye nezaretinde olğan Qırım Yuqarı mahkemesinde, yarımadada ğayabiy şekilde mahkemelengen Refat Çuburovnıñ davası boyunca olıp keçken mahkeme oturuşında qabaatlav tarafı Çubarov içün 9 yıl apis ceasını istedi.
«Qırım esnasınıñ» haber etkenine köre, devlet qabaatlayıcısı mahkemede Çubarovnıñ qabaatı zarar körgenlerniñ, şaatlarnıñ ve dava boyunca diger delillerniñ tam olaraq isbatlanğan, dep bildirgen.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
