Qırım ve Aqyarda Rusiye Tahqiqat komitetiniñ idaresi «qanun qoruyıcı organlarnıñ hadimlerine ücüm etüvnen» şübeli sayılğan 49 yaşındaki Aqmecit sakinine qarşı cinayet davası açılğanı aqqında malümatnı tasdıqladı. Evel, bunı Rusiye FSB-sine atfı etip Rusiye haber vastaları haber etken edi.
İdareniñ bildirgenine köre, erkek «operativ vazifeni» eda etken FSB hadimlerine ateş açqan.
«Bu yılnıñ mayısnıñ 11-nde, Aqmescit sakini, Qırım Cumhuriyeti ve Aqyarda Rusiyeniñ FSB idaresiniñ hadimleri operativ vazifesini eda etkende olarğa tirenip üç hadimge qarşı bir qaç kere ateş açtı. Vatandaşnıñ qanunsız faaliyeti neticesinde FSB idaresiniñ hadimleri zarar körmedi», – dep yazıla Tahqiqat komitetiniñ malümatında.
Qayd etilgenine köre, dava Rusiye Ceza qanunnamesiniñ 317 madesine binaen açılğan. Maddege köre, erkek on eki yıldan yigirmi yılğa qadar ya da ömürlik apis cezasına mahküm etile bile.
Şübeliniñ adı, soyadı ve vaqianıñ diger tafsilâtları belli degil.
Aqmescit civarındaki Dubki mikrorayonında keçirilgen tintüv vaqtında Özbekistan vatandaşı Nabi (Ayub) Rahimov öldürildi.
Refat Çubarov ve Lutfiye Zudiyevanıñ malümatına köre, Rahimovnıñ ömür arqadaşı Sahiba Burhanova ve 15 yaşında oğullarını alâ daa tapıp olamaylar.
«Qomşular ve köydeşler politsiyağa ömür arqadaşı ve 15 yaşında oğulları ğayıp olğanına dair arizalar bere», – dep qayd etti Zudiyeva.
Qırım Muhtar Cumhuriyetiniñ prokuraturası Qırımda keçirilgen tintüv ve tutuvlarnen bağlı cinaiy tahqiqat başlattı.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi.
«Qırım birdemligi» cemaat birleşmesi Qırım.Aqiqatqa bildirgenine köre, Aqmescit civarındaki Dubki köyünde daa bir tintüv başlandı. Tahminlerge köre, anda bu saba İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgenAyub Rahimov buluna bile.
İçki rayonındaki Rusiye İç işler nazirligi bölüginiñ migratsiya meseleleri bölügine alıp ketirilgen Sahiba Burhanovanıñ oğlu 15 yaşında Taqyuddin Yanış Taqıldaki evlerinde tedbirler yekünlendi, dep bildirdi.
