Avgustnıñ 13-ünde Taganrog (Rusiye) şeer mahkemesi, ekinci Aqmescit "Hizb ut-Tahrir davası"nıñ dört iştirakçisiniñ apis müddetini uzattı. Böylece, Seyran Murtaza, Mecit Abdurahmanov, Enver Ametov ve Rustem Seythalilov noyabr 14-üne SİZOda bulunacaq.
"Qırım birdemligi" bildirgeni kibi, mahkeme oturışında Ukraina konsulı İvan Zagorodnıy bulundı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
