Tacikistan prezidentiniñ matbuat hızmeti, iyül 26-sında eki devlet başı Emomali Rahmon ve Sooronbay Jeenbekov, Voruh-Aq-Say yolunda körüşip, sıñır yanında yerleşken qasabalarnıñ ealisi ile subet keçireceklerini, bildirdi.
Devlet başınıñ matbuat kâtibi Abdufattoh Şarifzoda, prezidentlerniñ ilerideki muzakereleri İsfarda olacaq, dep Radio Ozodige bildirdi.
İyül 22-sinde aqşam Qırğızistan territoriyasında yerleşken Boruh-Aq-Say adlı tacik köyünde çatışma başlandı. Onıñ neticesinde 17 Qırğızistan vatandaşı ve 10 Tacikistan vatandaşı yaralandı. Atuvlar, yerli sakinler köy kirişinde bayraq qoyğanından soñ, başlandı, dep bildire Qırğızistan sıñır hızmeti. Sıñırcılarğa köre, yerliler av tüfeklerinden ata edi.
Sıñırda çatışma, Qırğızistan prezidentiniñ Tacikistanğa ziyaretine bir qaç kün qalğanda oldı, körüşüvde prezidentler, hususan, şübeli şıñır parçaları meselesini de muzakere etecek.
Qırğızistan ile Tacikistannıñ sıñırı 970 kilometr, amma olardan tek 519 kilometri eki devlet arasında uyğunlaştırılğan. Belgilenmegen sıñır çızığı, sıñır yanında yerleşken qasabalarda çatışmalar peyda olğanınıñ sebeplerinden birisi olmaq mümkün. Davalı topraq parçalarında ise eali arasında daima suv, otlaq, topraq meseleleri, etnosara davaları sebebinden qavğalar çıqa. Bu qavğa-şatışmalar vaqtında taşlar atılar, kimerde silâ da qullanıla.
