17 Qırğızistan vatandaşı ve 10 Tacikistan vatandaşı, eki devlet sıñrında olğan çatışmada yaralandı, dep bildire Ozodi ve Azattık Radioları - Azatlıq Radiosınıñ Tacikistan ve Qırğızistan bölükleri. Tünevin Tacikistan tarafından elâk olğan bir kişi aqqında bildirilgen edi.
Vaqia iyül 22-sinde Qırğızistan territoriyasında yerleşken Boruh adlı tacik köyünde başlandı. Atuvlar, yerli sakinler köy kirişinde bayraq qoyğanından soñ, başlandı, dep bildire Qırğızistan sıñır hızmeti. Sıñırcılarğa köre, yerliler av tüfeklerinden ata edi.
Tacikistan tarafı, ateşni Qırğızistan sakinleri açtı, dep iddia ete.
İyül 23-ünde atuvlar yañıdan başlandı.
Qırğızistan ile Tacikistannıñ sıñırı 970 kilometr, amma olardan tek 519 kilometri eki devlet arasında uyğunlaştırılğan. Davalı topraq parçalarında ise eali arasında daima suv, otlaq ve topraq meseleleri sebebinden qavğalar çıqa.
Sıñırda çatışma, Qırğızistan prezidentiniñ Tacikistanğa ziyaretine bir qaç kün qalğanda oldı, körüşüvde prezidentler, hususan, şübeli şıñır parçaları meselesini de muzakere etecek.
