Herson vilâyeti devlet memuriyetiniñ yolbaşçısı Yuriy Gusev Türkiye elçisi Yağmur Ahmet Gülderenen körüşip, işğal etilgen Qırımdan memleket içinde köçip kelgenler içün 500 daireni quruv leyhasınıñ yerine ketirilmesini muzakere etti.
Bu aqta Herson vilâyeti devlet memuriyetiniñ matbuat hızmeti bildire.
«Bugünki körüşüvniñ neticesi bu leyhanı yerine ketirüv yol haritasını tizüv añlaşması oldı. Vaqtınca işğal altındaki Qırım Muhtar Cumhuriyetinden memleket içinde köçip kelgenler içün 500 daire qurulacaq areket planını azırlamaq içün kelecek afta Türkiye elçihanesi, Herson vilâyeti devlet memuriyetiniñ reberligi ve Qırımtatar Milliy Meclisiniñ areketleri belgilenecek», – dep aytıla haberde.
Gusevniñ aytqanına köre, yañı dairelerniñ sakinleri içün iş yerleriniñ açılması pek müim. O, bu mesken komplekslerini içtimaiy infrastruktura obyektlerinen temin etmege planlaştırıla, dep bildirdi.
Türkiye tabiat ve şeer qurucılığı Toplu Konut İdaresiniñ yolbaşçı muavini Orhan Yüceniñ aytqanına köre, insanlarnı qurulğan dairelerge kelecek baarde yerleştirecekler. Onıñ fikirince, qurucılıq bu yıl – mayıs – iyün başında başlamalı.
Berilgen malümatqa köre, Güsev bugünki qararlarnı tasdıqlamaq içün Herson ve Türkiye arasında añlaşma imzalamağa teklif etti.
Hatırlatamız, Türkiye prezidenti Recep Tayyip Erdoğan Ukraina prezidenti Volodımır Zelenskıynen 500 qırımtatar qorantası içün mesken qurmağa añlaştı, dep bildirgen edi.
Fevralniñ 3-nde resmiy körüşüv vaqtında Ukraina prezidenti Türkiye prezidentinen Rusiye işğal etken Qırımda insan aqları bozuv ve siyasiy mabüs qırımtatarlarnıñ azat etilüvinde yardım meselelerini muzakere etti.
Zelenskıynen körüşken Türkiye prezidenti Ankara Qırımnıñ qanunsız ilhaqını qabul etmeycek ve Ukraina topraq bütünligine qoltuta, dep bildirdi.
Ukraina prezidenti Volodımır Zelenskıy 2019 senesi avgustnıñ 7-nde Türkiye prezidenti Recep Tayyip Erdoğannen Ankarada muzakere keçirgen edi. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, em de iqtisadiy işbirligi ve yol ve ava limanlarını beraber quruv aqqında laf etti.
