Türkiye prezidenti Recep Tayyip Erdoğan, Ukraina prezidenti Volodımır Zelenskıynen 500 qırımtatar qorantası içün beraber mesken qurmağa añlaştı, dep bildirdi.
Bu aqta o, Kyivde Zelenskıynen yapqan matbuat konferentsiyası vaqtında ayttı.
«Biz (prezident Zelenskıynen – QA) 500 qoranta (qırımtatar qorantası – QA) içün infrastrukturanen beraber mesken qurmağa qarar aldıq. Nazirlerimiz bu meseleni muzakere etecek. Ve biz beraber areket etecekmiz. Mütehassıslarımız kelip, leyha azırlar ve Ukraina ekspertlerinen beraber tez qurıp başlarmız», – dedi Erdoğan.
Türkiye prezidenti fevralniñ 3-nde Kyivde resmiy ziyaret çerçivesinde buluna.
Fevralniñ 3-nde resmiy körüşüv vaqtında Ukraina prezidenti Türkiye prezidentinen Rusiye işğal etken Qırımda insan aqları bozuv ve siyasiy mabüs qırımtatarlarnıñ azat etilüvinde yardım meselelerini muzakere etti.
Zelenskıynen körüşken Türkiye prezidenti Ankara Qırımnıñ qanunsız ilhaqını qabul etmeycek ve Ukraina topraq bütünligine qoltuta, dep bildirdi.
Ukraina prezidenti Volodımır Zelenskıy 2019 senesi avgustnıñ 7-nde Türkiye prezidenti Recep Tayyip Erdoğannen Ankarada muzakere keçirgen edi. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, em de iqtisadiy işbirligi ve yol ve ava limanlarını beraber quruv aqqında laf etti.
