İyül 3-ünde Antaliyada Ukraina Tış İşler Naziri Dmıtro Kuleba ve onıñ Türkiye zenaatdaşı Mevlüt Çuvaşoğlu, Qırımda qırımtatarlarnıñ aqlarınıñ bozulmasını ve ukrain siyasiy mabüslerniñ azat etilmesini muzakere etti.
"Nazirler, Qırımda qırımtatarlarnıñ aqlarınıñ bozulmasını toqtatmaq ve ukrain siyasiy mabüslerniñ azat etilmek içün halqara meydançıqlarda yapılacaq adımlarını muzakere etti", - denile ukrain müessiseniñ saytında.
Em de Mevlüt Çavuşoğlu, Türkiye Herson vilâyetinde Qırım köçebeleri içün mesken qurmasını añlaşqanlarından vazgeçmegenini hatırlattı.
İyünde Ukraina prezidenti Volodımır Zelenskıy ve Türkiye prezidenti Recep Tayyip Erdoğan, Herson vilâyetinde qırımtatar qorantaları içün meskenlerniñ qurmasını muzakere etti.
Fevralniñ 3-nde resmiy körüşüv vaqtında Ukraina prezidenti Türkiye prezidentinen Rusiye işğal etken Qırımda insan aqları bozuv ve siyasiy mabüs qırımtatarlarnıñ azat etilüvinde yardım meselelerini muzakere etti.
Zelenskıynen körüşken Türkiye prezidenti Ankara Qırımnıñ qanunsız ilhaqını qabul etmeycek ve Ukraina topraq bütünligine qoltuta, dep bildirdi.
Ukraina prezidenti Volodımır Zelenskıy 2019 senesi avgustnıñ 7-nde Türkiye prezidenti Recep Tayyip Erdoğannen Ankarada muzakere keçirgen edi. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, em de iqtisadiy işbirligi ve yol ve ava limanlarını beraber quruv aqqında laf etti.
