Ukraina prezidenti Volodımır Zelenskıy ve Türkiye prezidenti Recep Tayyip Erdoğan, Herson vilâyetinde qırımtatar qorantaları içün meskenlerniñ qurmasını muzakere etti.
Bunıñ aqqında Ukraina prezidentiniñ Ofisinde haber ettiler.
"Menim avalemnen ükümetimiz tehnikiy meselelerni tayin etecek Ukraina-Türkiye ükümetlerara memorandumnıñ metini üzerinde çalışa", - qayd etti Zelenskıy.
Ukraina prezidenti, Ukrainanıñ suvereniteti ve territorial bütünligi boyunca deñişmez yanaşması ve qırımtatar halqınıñ aqlarınıñ qorçalavı içün Türkiyege minnetdarlığını bildirdi.
Türkiye tarafı Ukraina prezidenti ile lafnıñ neticeleri aqqında daa bildirmedi.
Hatırlatamız, Türkiye prezidenti Recep Tayyip Erdoğan Ukraina prezidenti Volodımır Zelenskıynen 500 qırımtatar qorantası içün mesken qurmağa añlaştı, dep bildirgen edi.
Herson vilâyeti devlet memuriyetiniñ yolbaşçısı Yuriy Gusev Türkiye elçisi Yağmur Ahmet Gülderenen körüşip, işğal etilgen Qırımdan memleket içinde köçip kelgenler içün 500 daireni quruv leyhasınıñ yerine ketirilmesini muzakere etti.
Fevralniñ 3-nde resmiy körüşüv vaqtında Ukraina prezidenti Türkiye prezidentinen Rusiye işğal etken Qırımda insan aqları bozuv ve siyasiy mabüs qırımtatarlarnıñ azat etilüvinde yardım meselelerini muzakere etti.
Zelenskıynen körüşken Türkiye prezidenti Ankara Qırımnıñ qanunsız ilhaqını qabul etmeycek ve Ukraina topraq bütünligine qoltuta, dep bildirdi.
Ukraina prezidenti Volodımır Zelenskıy 2019 senesi avgustnıñ 7-nde Türkiye prezidenti Recep Tayyip Erdoğannen Ankarada muzakere keçirgen edi. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, em de iqtisadiy işbirligi ve yol ve ava limanlarını beraber quruv aqqında laf etti.
