“Türkiye daima qırımtatarlarğa qol tutacaq”. İstanbulda Qırım işğaline qarşı miting keçti

İstanbulnıñ eski qısmında Beyazit meydanında martnıñ 3-ündeQırım işğaline qarşı miting keçti. Narazılıq yarımada işğaliniñ 5-yıllığına yapıldı. Qırımtatarlar teşkil etken aktsiyada ukrain diasporasınıñ vekilleri ve Türkiye vatandaşları da iştirak etti. İştirakçılar, Stalin yapqan sürgünlik ve bugünde-bugün rusiye akimiyeti yapqan basqını oşattılar ve elâk olğan qırımlılar içün dua etti.

“Biz bugün mında yarımada işğaline narazılığımıznı bildirmege keldik, bizcesine, Qırım - bu Ukraina”, - dedi Qırım.Aqiqat mühbirine İstanbuldaki ukrain diaporası vekili Tetâna Rıbçenko.

İstanbul iş adamı ve siyasetşınas Hüseyn Hatipoğlu - qırımtatarlarnı dostu ve rusiye propagandasına qarşı çıqqan türk.

“Türk halqınıñ 60-70 %-ı Qırım alı raatsızlay ve Ukraina birligine ve qırımtatarlarğa qol tuta. Prezident ve akimiyet daima qardaşlarımız - qırımtatarlağa destek kösterecek. Türkiye Cumhuriyetiniñ Tış İşler Naziri Mevlüt Çavuşoğlu, Qırımdan mecburiy Herson vilâyetine ve Kyivge köçkenlerge ev qurulışınen yardım etecegini resmiy bildirdi. Türkiyeniñ daa bir yatırım leyhası - Hersonda onkologik merkeziniñ qurulması. Bundan ğayrı, Türkiye Ukrainağa silânen yardım ete. Şimdilik Kyiv Ankaradan 12 uçucısız uçaq satın aldı. Ve silâ aqqında daa başqa muzakereler etile”, - dedi o.

Hüseyn ve semetdeşleri işğal etilgen Donbassta ve Qırımda keçken adiselerni körip, çoq acı çekkenini ayta. Qırımtatarlarnıñ özleri ise, Türkiye akimiyeti ve cemiyetiniñ, bundan ğayrı halqara topluluğınıñ büyük destegini duyğanını ayta.

“Halqara teşkilâtlarda qırımtatarlarğa bağışlanğan bir sıra tedbir ötkerdik. Ve Türkiye akimiyetiniñ meraq ve destegini duyamız. Ertemi-keçmi Qırım azat olacağına inanamız. İşte, 40 yıl evel Sovet Birligi yıqılacağını kimse tahmin etip olamay edi bile, amma demokratik esnaslar toqtatılmaz. Zemaneviy Rusiye öz imperiyasever isteklerini basqı ile kerçekleştirmege tırışsa da, ğayelerni yoq etmege küçleri yetmez”, - Qırım.Aqiqatqa tefsir berip dedi Türkiyede qırımtatar diasporasınıñ başı, Halqara qırımtatar kongressiniñ azası Alper Yavuzeser.

Toplanğanlar, Qırımda basqı tek qırımtatarlarğa qarşı degil de, ukrainlerge de tiye dep ayta. Lidiya Kovalenko, anası ve qız qardaşını ilhaqtan soñ acele Ukrainağa köçtürmege mecbur olğanını aytıp berdi. Özü o endi 20 yıl devamında Türkiyede yaşay.

“Qırımda lğan şeyler aqqında kerçekni tapıp bilmek qıyın, çünki adamlar Skype-tan bile aytıp bermege saqına, olarnı diñleyler dep qorqalar. Çoqusı siyasetten uzaqlaşa. Mında, Türkiyede müit başqa - qırımtatarlar bu destekni duya”, - dey o.

“Emel Qırım” fondunıñ başı ve Türkiyede qırımtatar milliy meclisniñ vekili Zafer Karatay, ilhaqtan soñ Türkiyege qaçmağa mecbur olğan 200-ge qadar qırımtatar qorantasını bilgenini ayta.

“Ebet, bütün dünyada qırımtatar diasporası böyle adamlarğa yardım etmege tırışa, amma ep bir qırımtatarlarnıñ çoqusı, basqığa baqmadan, Qırımda qalmaq kerek dep saya. Qırım - bizim vatanımız, onı qaldırıp ketmek mümkün degil. Putin ise tamam bunı istey - bütün qırımtatarlar yarımadadan ketsin dep. Amma bu maqsadına o iç bir vaqıt irişmez”, - dep saya Zafer Karatay.​

Belgi: mart 2-sinde Türkiye paytahtı Ankarada Rusiyeniñ Qırımnı işğal etkenine qarşı miting keçirildi.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.