Aqyar demiryol vokzalında keçken Suriye “ğanimet silâsı” sergisi, qomşu Rusiyege yollanıldı. Bu aqta Rusiye Mudafaa nazirliginiñ matbuat hızmeti bildire.
“Qırım sakinleri ve musafirleriniñ 12 biñi “Suriye qırığı” köçme sergisi ziyaret etti”, - denile beyanatta.
Müessisede, “Suriye qırığı” aktsiyası Rusiye ve Suriye arbiy quvetlerniñ halqara terrorcılıqqa qarşı “muvafaqiyetlerni numayış etmek” maqsadınen keçirilgenini bildirdi. Sergi keçirilüvi Ulu Vatan Cenkinde ğalebeniñ 74 yıllığına bağışlana
Aqyardan soñ eşelon Novorossiysk şeerinde toqtanacaq.
Suriye “ğanimet”leri: Aqyarda silâ sergisi (süret toplamı)
Sergi nümüneleri arasında sanki “Suriye uruşlarında terrorcılardan tutılıp alınğan” silâ ve teçhizatlar kösterile. Olarnıñ arasında, teşkilcilerniñ aytqanına köre, özyapma patlayıcı cihazlar, qanunsız himiyeviy ameliyathane, “şeitlerniñ maşnası” ve arbiy maqsatlar içün deñiştirilgen maşnalar.
Teşkilciler, sergide 500-den ziyade silâ çeşiti numayış etildi, dep bildire. Bundan ğayrı demiryol vokzalınıñ meydanında köçüci aşhane ve kontsert sanası qoyuldı. Rusiye arbiy adamları, ekskursiya keçirip, Suriyedeki cenk tecribeleri aqqında aytıp bere edi.
Bir kün evel sergi Keriçke kelgen edi.
Bundan soñ onı Keriçten Aqyarğa keçirdiler.
