SUDAQ – Bütün tahminlerden añlaşılğanına köre, bu yıl Qırımda kurort mevsimi ya zayıf olacaq, ya iç olmaycaq. Şimdilik öyle de çıqa. Populâr olğan Sudaq bile iyunniñ ortasında turistsiz qala.
Şunı qabul etmek kerek ki, bu mevsimde ava da salqın, şunıñ içün deñiz tek iyünniñ 10-na yaqın qızdı, tek şimdi yuvunmaq mümkün. Bundan evel suv sıcaqlığı 18 derecege çıqmay edi.
Raatlanğanlar pek az, TOK «Sudak» şifahane kompleksinde kimse yoq. Soñki yılları boş ve tamir etilmesi kerek olğan arbiy şifahane ise bu yıl pijamalı erkeklernen tolup başladı – gospitallerden soñ Rusiye arbiyleri mında reabilitatsiyadan keçe eken. Şifahaneden çıqmaylar. Sudaqlılar qayd etkenine köre, er kün olarnıñ sayısı arta. Söz sırası, 2024 senesi bu şifahane 100 yılını tolduracaq. Bazı yerli sakinler para qazanmağa çare taptı – para alıp, şifahanede raatlanğan pijamalı erkeklerge tütün ve içki satın ala.
Yerli iş adamlarınıñ beti sıtıq
Adet üzre bu vaqıtta şeerniñ gece ayatı qaynay ve plâjlar insan tolu, amma bu yaz öyle degil. Yerli iş adamlarınıñ beti sıtıq – biznes bir fayda ketirmey, sarf etilgen para ise az degil. Plâjda insanlar bar olğanını oşay, amma esasen yerliler ya da suv attraktsionlarınen meraqlanmağan qırımlılar. «Bananda» çalışqan erkek deñizge çıqmaq içün dört insannı toplağance bir üç saat kete. Kater ve qayıqlarnıñ saipleri işsiz otura, müşteri az.
Amma er şeyniñ bir hayırı bar, turistler çoq yoq ve talap da yoq, qavelerde, Selvi alleyasında bile fiyatlar bayağı uyğun. Meselâ, bir kâse borşç 65 ruble, tavuq – 90 ruble, yengeç salatı – 80 ruble, samsa – 100 ruble, şunıñ içün Sudaqta 400 rublege yahşı ve lezetli aşamaq mümkün.
Yalı kenarında kiralıq bala elektrik arabaları bar, şunıñ içün raat kezmege imkân yoq – balalar tez ayaday, keçkenlerge qulaq asmay. Mında eşekke minmege, maymun ya da bayquşnen foto yapmağa teklif eteler, ayvanğa kiyingen mazallı ağalar ise para alıp, olarnen foto çıqarmağa zorlay.
Sudaq yanındaki «Tavrida» Art-klasterinde yañı binalar quruldı, amma qurucılıq işleri devam ete. «Tavrida» kenişley, yañı yerlerni qaplap ala.
Arqa Deresi (Mindalnoye) kurort qasabasınıñ sakinleri ise gece yuqlap olamay – «Tavrida» gençler forumındaki gece diskoları sağırnı da uyandırır.
Arqa Deresi qasabasında esas Ukrayına sakinlerine ait pek çoq ev ve topraq damartısı bar edi, şunıñ içün yerli reberlik saiplernen bağlanıp, olarnıñ mülkini ucuzdan aldı ve yahşı qazandı. Yani er vaqıt kibi, biri belâda, digeri kâr ete.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.