Rusiye kontrolindeki Sudaq şeer mahkemesi silânı qanunsız satın alıp saqlağanında qabaatlanğan qırımtatar faali İlver Ametovnıñ dava oturışuvında oktâbrniñ 5-nde mermi ekspertini sorğuğa çekti. «Qırım birdemliginiñ» toplaşuv neticeleri aqqında advokat Aleksey Rostovtsev tarif etti.
«Yahşı sorğu oldı. Ekspert tarafsız, yahşı cevap berdi. Müvekkilimden alınğan müzey eşyası silâ olaraq qullanıla bilemi degen sualge cevap berip olamağanını añlattı. Yani canlı nişan içün kelişemi ya da yoq aytıp olamadı. Şu sebepten mahkeme oturışuvında oktâbrniñ 21-ne qadar teneffüs ilân etildi ve ilk ekspertizanı yapqan ekspert davet etildi», – dedi imayeci.
Qayd etilgenine köre, ekspertizanı ekspert-kriminalistik bölüginiñ üyken inspektorı keçirdi, onıñ aliy tasili ve ekspert-kriminalistik inspektorı zenaatı bar.
«Qırım birdemligi» mühbiriniñ bildirgenine köre, mahkemede seslendirilgen dava malümatına köre, «2019 senesi sentâbrniñ 27-nde keçirilgen tintüv vaqtında İlver Ametovdan tutıp alınğan silâ «Nagan» (1895 senesi) sistemasınıñ bir namlulı, qısqa namlulı, tegiz namlulı, kesken, bir tolduruvlı, yedi tolduruvlı ekvivalenti ola». 1891-1930 seneleriniñ kesken, nariye silâsınıñ boş qutusı, boş mehanizmi bar».
İlver Ametov içün bu eşyalarnıñ medeniy ve tarihiy emiyeti bar, o, antika eşyaları mahkeme qararına köre yoq etileceginden qorqa.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
