Kreml kontrolindeki Sudaqnıñ Mirovoy mahkemesi 2019 senesi sentâbrniñ 27-nde Rusiye quvetçileri tintüv keçirgen Sudaq regional Meclisiniñ reisi İlver Ametovğa 150 biñ ruble miqdarında para cezasını bermege qarar aldı. Ametovnıñ Qırım.Aqiqatqa bildirgenine köre, para cezası onıñ iş adamı faaliyetinen bağlı.
Qararğa köre, para cezası «telükesizlik talaplarına uymağan mallarnı istisal etüv ve satuv sebebinden» berildi.
Ametovnıñ malümatına köre, oña ait «Bazırgân» qavesiniñ sofracıları ve hadimleri bıltır mevsimniñ soñunda mevsim qapatılğanını qayd etmege istep, 12 şişe konyak, raqı, şampan ketirdi, amma oña haber etmediler. Tintüv vaqtında Rusiye quvetçileri olarnı alıp, Ametovnı içki saqlağanında qabaatladı.
«İçki saqlağanımda qabaatladılar, ne qadar isbatlasam da, «ürmetli insanlarğa» maña ait olmağanını isbatlap olamadım», – dep ayta Ametov.
Onıñ qayd etkenine köre, yıl devamında iş adamı faaliyetini kerçekleştirgende bozuvları olğanına dair davanen bağlı dört mahkeme oturışuvı oldı. Ametovnıñ fikirince, «bu dava siyasiy baqışları ve cemaat faaliyeti içün sımarlanğan».
«Neticede maña ait olmağan, sofracı ve işçiler ketirgen 12 şişe sebebinden 275 biñ ruble çıqtı. Mevsim bitkenini qayd etmege istediler. Buña alâqam yoq. Bu menim fikrim», – dep qoştı o,
Ametov bu para cezasını üç kün içinde ödemeli.
«Ödemesem, eki qat arta eken. Maşinamnı satacam, başqa çaremmi bar!?», – dedi o.
Sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ reisi Refat Çubarov bir qaç on silâlı Rusiye quvetçisi İlver Ametovnıñ evini blok etti, dep bildirgen edi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Sudaqtaki tintüvlerden soñ Ametovnıñ Qırımtatar Milliy Meclisiniñ aza şeadetnamesi, müzey eksponatları, bazı vesiqalar «ekspertizağa» alındı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Rusiye quvetçileri İlver Ametovnıñ evini endi tintken edi. Birinci tintüv 2015 senesi dekabr ayında, o, hastahanede olğanda, keçirilgen edi. Sebebi belli degil. 2017 senesi mayısında quvetçiler tekrar kelip, oğlunı tuttı.
