Qırımlı ukrain rejissöri, Kremlniñ eski siyasiy mabüsi Oleg Sentsov ukrainalı studentlernen beraber Strasburgda Aqmescitte apiske alınğan qırımtatar faali ve siyasetçisi Nariman Celâlğa qoltutuv fleşmobını keçirdi, dep bildirdi.
«Tünevin Avropa parlamentiniñ Strasburgda gençler içün er yıl teşkil etken European Youth Event tedbirinde iştirak ettim. Ukrainalı studentler ve Saharov mukâfatınıñ namzetlerinen ukrainalı siyasiy mabüs Nariman Celâlğa qoltutuv fleşmobını keçirdik», – dep yazdı oktâbrniñ 10-nda Facebookta Sentsov.
Aktsiya iştirakçileriniñ qollarında Celâlnıñ fotosüretinen ve Free Nariman Dzhelal yazısınen futbolkalar bar edi.
Bu afta belli olğanına köre, Nariman Celâlnı psihiatrik ekspertizasına yolladılar. Bu aqta advokatı Nikolay Polozov oktâbrniñ 8-nde bildirdi. Onıñ aytqanına köre, faal bu ekspertizadan keçmege razı olmadı. Celâlnıñ imayesi tahqiqatnıñ qararını şikâyet etmege niyetlene.
Nikolay Polozov, Nariman Celâl SİZOda mektüp almay, bu da «tsenzorlarnıñ» işinen bağlı ola bile, dep ayttı.
Keçken afta Aqmescitteki mahkeme Nariman Celâlnıñ imayesi bergen istinafnı baqıp, SİZOda qaluv müddetini bir künge qısqarttı. Böylece, faal noyabrniñ 3-ne qadar apiste qalacaq.
Polozovnıñ bildirgenine köre, Nariman Celâlov mahsus blokta tutula – tek tış dünyanen degil, diger mabüslernen bile bağı mümkün olğanı qadar sıñırlanğan SİZOnıñ mahsus bölüginde.
Bundan evel berilgen malümatqa köre, faalniñ qabaatlavı sertleştirildi, şimdi 20 yılğa qadar azatlıqtan marum etile bile. FSB, Nariman qabaatlanğan diversiya yapıluvına yardım etüvni diversiyada iştirak etüvge deñiştirip, qabaatlavnı sertleştirgen edi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
