Qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanıñ imayesi Rusiye kontrolindeki Aqmescit Kiyev rayon mahkemesiniñ Rusiye Memuriy cinayetler kodeksiniñ 20.3 maddesine istinaden Facebookta paylaşqanları içün 1000 ruble para cezası qararını şikâyet etecek.
Bu aqta Qırım.Aqiqat mühbiri bildire.
«Bizim fikirimiz deñişmedi, soñuna qadar küreşmege azırmız. Temyiz arizası olacaq. 100% eminim ki, Qırımnıñ Yuqarı mahkemesi onı qanaatlendirmeycek, amma mahkemede qorçalaycağımız müim ola», – dep ayttı advokat Lilâ Gemeci.
Onıñ qayd etkenine köre, müvekkiliniñ tutulmasında qaba bozuvlar oldı, dava ise uydurıldı. Saliyeva memuriy davanı Qırımdaki faallerge qarşı basqı dep tanıy, faqat neticesi aksine – «halqnı daa çoq birleştirecek», dep ümüt ete.
«Tutulğanına qıymet kesecek olsaq – mesüliyetke çekmek içün daa ziyade kelişken usullar bar, celpname, meselâ. Advokatnı kirsetmemek ve bağlanuv yasağı qorquzuv areketidir. Amma mahkeme ögünde toplaşqa insanlarnı körip, Qırım qadınları arasında yañı faaller çıqacağını, halq daa ziyade birleşecegini añlayım. Biriniñ yerine onlarnen, yüzlernen insan kele», – dep ayttı Saliyeva.
Aqmescitniñ Kiyev rayon mahkemesi mayısnıñ 31-nde qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Zudiyevanıñ aytqanına köre, dava malümatlarında qullanıcı Tagir Minibayevniñ 2014 senesi aprel ayında paylaşqan yazısı bar, Zudiyeva anda qayd etile.
Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı.
Qırım Muhtar Cumhuriyeti ve Aqyar Milliy politsiyasınıñ baş idaresi yarımadada qırımtatar faalleri Lutfiye Zudiyeva ve Mümine Saliyeva tutulğanından cinaiy tahqiqat açtı.
Al-azırda Qırım ve qomşu Rusiyeniñ müessiseleri bir de bir izaat bermediler.
