Ukraina Milliy telükesizlik ve mudafaa Şurasınıñ kâtibi Oleksiy Danılov martnıñ 11-nde, «Qırım yarımadasınıñ Rusiye Federatsiyası tarafından işğalinden bugüngece ilk temel vesiqanıñ» azırlanılğanı aqqında bildirdi. Bu vesiqada, Qırımnıñ işğalden azat etilmesi meselesinde nasıl areket etecegimizge dair açıq talimatlar berile. Bu aqta o, Kyivde brifing vaqtında ayttı.
Danılovnıñ malümatına köre, 2008 senesi RNBO qarar alğan edi: eki ay içinde Ukraina Nazirler kabineti, Rusiye Qara deñiz flotunıñ yarımadadan çıqarılması meselesini al etecek bir qanun leyhasını teklif etmek kerek edi.
«Yazıq ki, bu qanun leyhası belli olmağan bir sebepten azırlanmadı. Bu, telükesizligimizniñ bütün sistemasını daa da mahv etmege başlağan ve 2010 senesi Harkiv añlaşmalarınıñ ortağa çıqmasına sebep olğan ilk kirpiç olğanına inanamız», – dedi o.
RNBO kâtibi, SBU-nıñ Yuqarı Rada deputatlarınıñ bu mevzuda nasıl rey bergenlerini ögrenmege burğanını haber etti.
«SBU bunı kerek, dep saysa, o, rey bergenlerge qarşı Ukraina Ceza Qanunnamesiniñ 111 maddesine köre dava açmalı (devlet hainligi). Mebuslar 2010 senesi aprelniñ 27-nde rey bergen ediler. Altıncı çağıruvnıñ altıncı sessiyası. Bu cedvelde, bugünde de ukrain siyasetinen oğraşqan bir çoq meraqlı insan bar, bundan ğayrı bazıları, misal olaraq Litvin efendi Şevçenko adına Milliy universitetniñ rektorı vazifesine iddia ete. Siz meni bağışlañız, amma men şu studentlerniñ közlerine baqmaqtan utanır edim. Qırımnıñ işğaline ve Donetsk ve Lugansk vilâyetlerindeki meselelerge sebep olğan ayın şeylerge rey ber de, soñ rektor vazifesine iddia et», – dep qayd etti o.
Bundan ğayrı Oleksiy Danılovnıñ haber etkenine köre, Qırımnı işğalden azat etüv strategiyası açıq vesiqadır ve er istegen onen tanışıp ola. Ukrainanıñ çetel ortaqları yaqın vaqıtta bu vesiqanı alacaqlar.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
