Rusiyeniñ Cenübiy okrugınıñ arbiy mahkemesinde iyülniñ 27-nde Bağçasaraydaki dördünci «Hizb ut-Tahrir davası» mabüsleriniñ ilk asıl oturışuvı olıp keçti. «Qırım birdemligi» cemaat birleşmesi haber etkenine köre, dava mabüslerinden biri, Aleksandr Sizikov 1-inci derece saqatı olıp, Braillesiz oqup olamay. O, ev apsine alınğan edi. Faqat bugün mahkeme Rusiyeniñ Cezalarnı yerine ketirüv federal hızmetiniñ Sizikovnıñ sıñırlav tedbirini deñiştirmek teklifini seslendirdi.
«Bir çoq bozuvları sebebinden ev apsini SİZOğa deñiştirmege istediler – evinden sıq-sıq çıqa. Em qabaatlav, em imaye itiraz bildirdi. Faqat prokuror bozuvlar tekrarlasa, ağır hasta insannı apiske almağa mümkün olur, dep qayd etti», – dep aytıla haberde.
Qırımlı birinci derece saqatı ola, 2009 senesi tamamen soqurlaştı.
Rusiyeniñ Cenübiy okrugınıñ arbiy mahkemesi Sizikov, Sufyanov ve Seyran Hayredinovnıñ davası boyunca olıp keçken oturışuv aqqında açıq şekilde daa bildirmedi.
Sizikov ve diger mabüsler, Alim Sufyanov ve Seyran Hayredinov, 2003 senesinden berli Rusiyede terror tanılğan, amma Ukraina ve diger memleketlerniñ milliy qanunları seviyesinde çalışqan «Hizb ut-Tahrir» islâm terror firqası ile alâqaları bar olğanında qabaatlanalar. Alim Sufyanov ve Seyran Hayredinov 2020 senesi iyül ayında mahkeme salonında apiske alınıp, Aqmescit tahqiqat izolâtorına qapatıldı. 1-inci derece saqatlığı olğan Aleksandr Sizikov ev apsine alındı.
Berilgen malümatqa köre, mahkeme oturışuvında prokuror 234 kâğıttan ibaret qabaatlavnı seslendirdi. Üç mabüs qabaatını tanımadı.
«Terror teşkilâtlarınen alâqam yoq», – dep ayttı Sizikov. Qalğan mabüsler olıp keçkenlerge olğan munasebetini esnas devamında bildirmege vade ete.
Prokuror şaatlarnı sorğuğa çekmege, delillerni tedqiq etmege, soñra mabüslerni sorğuğa çekmege planlaştıra. Nevbetteki oturışuv avgustnıñ 10-nda olacaq.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Hatırlatamız, fevralniñ 24-nde Rusiye kontrolindeki Aqmescitniñ Kiyev rayon makhemesi Aleksandr Sizikovnıñ ev apsini uzatmağa qarar aldı.
Noyabrniñ 26-nda Rusiye kontrolindeki Aqmescitniñ Kiyev rayon mahkemesi FSB tahqiqatçısınıñ muracaatını qanaatlendirip, «Hizb ut-Tahrir davasınıñ» mabüsi Aleksandr Sizikovnı 2021 senesi martnıñ 2-ne qadar ev apsinde qaldırdı.
Rusiye kontrolindeki Aqmescitniñ Kiyev rayon mahkemesi oktâbrniñ 14-nde Bağçasaraydaki «Hizb ut-Tahrir davasınıñ» mabüsi Aleksandr Sizikovnı Aqyar şeer psihiatrik hastahanesine mahkeme-psihiatrik ekspertizasına bir ayğa yollamağa qarar aldı.
Ukraina Rusiyeden FSB tarafından «Hizb ut-Tahrir» teşkilâtını qurğanında qabaatlanğan qırımlı Aleksandr Sizikovnı azat etmesini talap ete.
İyülniñ 7-nde Rusiye kontrolindeki Aqmescitniñ Kiyev rayon mahkemesi «Hizb ut-Tahrir» teşkilâtını qurğanından şübheli sayılğan Sizikovnı ev apsine yolladı. Sizikov birinci derece saqatı olı, 2009 senesi soqurlaştı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
