Aqmescitniñ 2-nci SİZO-sında tutulğan qırımtatar faali Asan Ahtemovnıñ sağlıq alı fenalaşqan. Bunı Kreml mabüsleriniñ aqrabaları birleşmesi haber ete.
Birleşmeniñ malümatına köre, kamerada saba saat 6-dan aqşam saat 10-ğa qadar oturmaq ve yatmaq mümkün degil eken. Mabüslerge SİZO hadimleriniñ közlerine baqmağa yasaq ete ve Rusiye gimnini ezberlemege mecbur ete ekenler
"Böyle rejim sebebinden Asan Ahtemovnıñ sırt ağrısı keskinleşti. Siyasiy mabüslerniñ advokatları SİZO reberligine muracaat etip, tibbiy yardım ve yaşayış şaraiti ile bağlı problemlerge kösterdiler", - dep yaza birleşme feysbuk saifesinde.
İyünniñ başında Qırımtatar Milliy Meclisi reisi Refat Çubarov Aqmescitniñ 2-nci SİZO-sında qırımlı siyasiy mabüsler – Qırımtatar Milliy Meclisi reisiniñ muavini Nariman Celâl ve faaller ağa-qardaş Ahtemovlar iskencelerge oğratılğanını bilidrgen edi.
Rusiye kontrolindeki Qırım Yuqarı mahkemesi 2022 senesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Aqmescitteki 2-nci SİZO Rusiyeniñ Ukrayinağa qarşı büyük cenkiniñ başlamasından berli Qırımdan kelgen bildirmelerde yer alıp başladı. 366 kişilik izolâtornıñ quruluvı 2015 senesi başlanğan edi. Rusiyeniñ Ukrayinağa qarşı büyük cenki başlanğan soñ uquq qoruyıcılar bu SİZO-nıñ Rusiye tarafından vaqtınca işğal etilgen topraqlarda tutıp esir etilgen Ukrayina vatandaşları içün izolâtor kibi çalışqanını aşkâr ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
