Maksim Stepantsov
Keçken aftanıñ soñunda «Livadiya» devlet işhanesiniñ territoriyasına saat 20.00-de qaravullarnı silâsızlandırıp, mahsus kiyimlerde silâlanğan şahıslar kirdi. «Livadiya» işhanesiniñ telükesizlik hızmeti yolbaşçısınıñ aytqanına köre, şu gece çalışqan qaravulnıñ başına pistoletni yöñeltip, telefon vastasınen er şey tınç olğanını, reberine bildirmege mecbur ettiler. Amma, yolbaşçı, qaravulnı mecbur etkenlerini sesinden añladı.İşhane memuriyeti vekillerini belgisiz şahıslar yibermediler. Ateş açmaqnen qorquzdılar. Silâlanğan şahıslar iç bir muzakerelerni qabul etmeyip, vesiqalarnı da köstermediler.
İşhane yolbaşçıları, yalıñız, bu insanlar Qırım baş naziri Sergey Aksenov teşkil etken, Qırım mudafa temsilcileri olğanını ögrenip oldılar.
Kelecek künü, saba işhane bosağası yanında işçi ve yolbaşçılar toplaştılar. Silâlanğan adamlar, işhaneni qorumaq ve qırsızlıqnıñ ögüni almaq maqsadında kelgenlerini añlattılar. Olar, işçilerni kirgizip, amma iç bir şeyni çıqarmağa bermeyceklerini ilân ettiler. Toplanğan işçiler silâ astında çalışmağa saqındılar.
Genrih Mikaelân işhaneni zapt etkenlerge, şarap şişelerni satılış içün maşinalarğa yüklemege kerek olğanını añlatmağa tırıştı, amma «qoruyıcılar» iç bir şeyni alıp yüklemege ruhset bermeycegini bildirdiler. O vaqıt Mikaelân Yalta militsiyasına muracaat etmege mecbur etti. Şu yerge Yalta militsiyasınıñ Öleg Sitar ve hadimleri keldiler. Olar mudafaa temsilcilerinen muzakereler alıp bardılar, amma «qoruyıcılar» işhane territoriyasından ketmediler.
Kene esirlikmi?
Mart 28 künü «Livadiya» devlet işhanesiniñ sistem yöñelticisi Qırım mudafaa vekilleri tarafından esirlikke alındı. Cemaat ile alâqalar bölüginiñ yolbaşçısı Oleksandr Gorduznıñ aytqanına köre, onı buyurılğan vazifeni becergen vaqıtta yaqaladılar.
«Sistem yöñelticisi ve laboratoriya yarın şişelerge tkülecek şarapnıñ keyfiyetinin ögrenmek içün yolbaşçısı işhanege keldiler. Laboratoriya, şarapnıñ analizini ala, Andrey ise, malümatnı tablitsalargda qayd ete. Silâlanğan şahıslar yöñelticini yaqalap, qorquzdılar, şarap işhanesiniñ serverlerini alıp taşlamağa mejdbur ete ediler» — qayd etti Oleksandr Gorduz.
Muzakerelerden soñra yöñelticini azat ettiler.
Şimdiki vaqıtta, işhane territoriyasında silâlanğan şahıslarnıñ sayısı 20 teşkil etti. İşçilerniñ ömürleri ve sağlıqları içün saqınğan işhane yolbaşçıları prokuratura ve militsiyağa muracaat ettiler.
