Qırımnıñ Seyitler (Nijnegorsk) rayonında Caytamğalı (Yemelyanovka) köyünde martnıñ 17-sinde şahsiy evde yanığn oldı, neticede bir aqay elâk oldı, bildire Rusiye FVN-niñ Qırım idaresi.
"Eki saat içinde yanğın tarqalmasını toqtattılar ve onı söndürdiler. Ateş 40 kvadart metrni qapladı. Qurtarıcılarnıñ areketleri neticesinde alevniñ qomşu binalarğa keçmesi toqtatıldı. Amma, yazıq ki, bir ölü adamnıñ cesedi tapıldı", - denile beyanatta.
Müessiseniñ malümatına köre, yanğınnıñ sebeplerini bilmege tırışalar.
Fevralniñ 13-ünde gece Kefede Galereynaya soqağında yanğın oldı, onıñ sebebinden beş qatlı evniñ 15 sakinini tahliye ettiler.
Yanvarniñ 19-ında Qarasuvbazar rayonınıñ Efendiköyünde (Gruşevka) yanğında eki adam elâk oldı.
Kezlevde (Yevpatoriya) "Ozero snovideniy" SPA kompleksinde yanvarnıñ 13-ünde saba yanğın oldı. Qurtarıcılar 4 işçi ve 55 müşterini tahliye etti.
