Avgustnıñ 5-nde Aqmescitteki ekinci «Hizb ut-Tahrir davasınıñ» mabüsi Servet Gaziyev qırımtatar tilini qullanğanı içün Rostov-na-Donudaki Cenübiy okrugınıñ arbiy mahkemesi oturışuvından çıqarıldı, dep bildire advokat Yevgeniy Yegoroçkin.
Bu aqta o, «Qırım birdemligi» cemaat birleşmesine tarif etti.
«Mahkeme oturışuvında Gaziyevniñ qırımtatar tilinde aytmaq aqqına keder etkenler, ve mahkeme onı çıqarmağa qarar berdi. Oturışuv onsız devam etti», – dep bildirdi advokat.
Onıñ aytqanına köre, qabaatlayıcı dava malümatlarını pek yavaş oqudı, şunıñ içün Gaziyev ondan daa açıq aytmasını qırımtatarca rica etti». Bundan soñ mahkeme onı tenbilep, mahkemeden çıqardı, dep ayta advokat.
Rostov mahkemesiniñ vekilleri advokatnıñ Gaziyevnen bağlı malümatını izaatlamadı. Gaziyev qırımtatarca laf etkeni içün mahkemeden endi çıqarılğan edi. Bunıñ kibi adise bu sene baarde oldı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
