Kremlniñ eski siyasiy mabüsi, qırımlı ukrain rejissöri Oleg Sentsov Aqmescitte apiske alınğan qırımtatar faali Nariman Celâlğa qarşı qabaatlav sertleştirilgenini tefsir etti. Sentsov Rusiye tahqiqatınıñ qabaatlavını «tipik», Celâlğa berilmesi mümkün olğan apis cezasını ise «qorqunç bir raqam» dep adlandırdı.
«Nariman Celâl 20 yılğa azatlıqqa alına bile. Qabaatlav tipik: işğalcilerniñ akimiyetine boysunmadı. Bu tek qorqunç bir raqam degil. Bu müddetke bütün ömür sığdırıla bile. O suvuq ışıqsız boz divarlarda bir kün bile ebediylik kibi ola. 20 yılnı endi aytmayım. Ve Nariman bir şey imzalamadı. Teslim olmay. Çünki aqiqat onıñ yanında. Dayan, dostum! Yanıñdamız», – dep yazdı Sentsov Facebookta.
Qırımda apiske alınğan qırımtatar faali Nariman Celâlnıñ Anğara köyünde «gaz borusındaki diversiya» davası boyunca qabaatlavı sertleştirildi. Celâl 12 yıldan 20 yılğa qadar apiske alına bile.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
