Eski siyasiy mabüs, qırımlı ukrain rejissöri Oleg Sentsov rejissör Nariman Aliyevniñ «Evge» filmine qıymet kesti.
Sentsovnıñ aytqanına köre, «esas Ukrainağa köçken iç bir qırımlı lâqayt qalamaz».
«Bu filmnen Ukraina ğururlana bile, Cannes festivaliniñ ekinci yarışına saylav da bunı isbatlay. Aliyevniñ işi şekil olaraq Zvâgintsevniñ «Avdet» debütini añdırdı, amma manaları farqlı ve bizim problemimiz bizge daa yaqın. Qırım aqqında film çıqarğan er kes sağ olsun», – dep yazdı teessuratını Sentsov Facebookta.
Film Kyivdeki «Oskar» kinoteatrinde noyabrniñ 5-nde taqdim etildi.
Qırımtatar rejissöri Nariman Aliyevniñ «Evge» filmi oktâbrniñ 24-nde «Eñ eyi uzun film» nominatsiyasında «Kinokolo» Ukraina kinokritikleri milliy mukâfatını aldı.
Levha 7-inci Halqara Bosfor film festivaliniñ eñ eyi çetel filmi olaraq tanıldı.
Nariman Aliyevniñ filmi «Oskar» mukâfatınıñ long listine kirdi. Film, Odesa halqara film festivalinde gran-pri qazandı.
Aliyevniñ «Evge» filmi Cannes festivaliniñ «Ayrı bir baqış» yarış programmasınıñ iştirakçisi edi, Bükreşteki halqara kinofestivalinde eñ eyi film mukâfatını qazandı.
Süjetke köre, baş qaraman Mustafanıñ (bu rolni qırımtatar asıllı ukrainalı oyuncı ve rejissör Ahtem Seitablayev – QA) büyük oğlu Ukraina şarqındaki cenkte elâk ola. O, onı vatanda, Rusiye işğal etken Qırımda defin etmege qarar ala. Küçük oğlu ve elâk olğan oğlunıñ naaşınen beraber Mustafa yarımadağa yol ala.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
